Kaketshirtem lenir tajung akümtsü asoshi Patton-i ajungshi

Wokha, Luchii/December 21 (TYO): Wokha District kübok New Changsu Village nung Luchii/December 20,2018 nü New Changsu Students’ Union küm 50 ajungba sentong agiba mapang Nagaland Deputy Chief Minister, Y Patton tetushi tesemdanger ama aruagi dena liasü.
Sentong nung jembiba mapang, Patton-i, tan putu nung kaketshirtem nükjidong tongtetter kaka akümtsü asoshi shisaliok bushiba wadang nung nendaka aser meranga inyaktsüji kanga dang nüngdak, ta ashi.
Pei tetsü oshi, koba tawa tanü ka Lanurtem tsüngda kanga dang kara sama odaki, iba atemaji sasaba olen ka nung Patton-i kaketshirtem dang pei tetsü oshi nung temulung agütsütsü asoshi ajungshi.
Iba olen den külemi, Jubilee benjungmung tetezüji tatok agütsütepa aser longjemshiba mapang ka lir ta paisa sentong nung adenertem dang ashi.
Patton-isa, kaketshirtem dang tanga lenla nung temulung agütsüba den libaliro dak alia kaketshisatsü nung temulung taliba agütsütsü ayongzük.
Iba olen den bendenloksema, kaketshirtemi mobile phone tim lenmang nung mamshiba ajanga pei nükjidong nung tetsükdaktsü ajuruba aser iba ji ajanga Nagaland nung küm tom nung school yutsüba/doktsüba kaketshirtem (drop out student) timba küma aoba indang metetdakja liasü.
Maneni Patton-isa Government High School tem dang shisaliok bushiba nung tenüng tajung bener arutsü asoshi tajungshiba agütsü aser iba denji külemi pa indang constituency nungi Government High School kari danga tenüng tajung bener arutsüra, pai senpet sen lakh 2 agütsütsü nangzük.
Sentong tetenzüklen Deputy Chief Minister, Patton-i New Changsu Village nung Jubilee nüngshilong semzükja liasü aser ibaji NCBC Pastor S Liponthung Tungoe-i meshiteta sarasademtsü.
Changsu Students’ Union küm 50 ajungba Jubilee omen – “Rewind, Restructure and Rebuild” nung ajemdaker Notary Public, Advocate, Khyothungo Tungoe-i jembia liasü.
Kasa sentong nung NCSU president, N Lithungo Tungoe-i telok pelaa agizükba o jembi; Lotha Students’ Union, President aser Englan Range Students’ Union President nati salem osang aben.
1968 küm iba Union tentetsang President, Akhomo Tungoe-i NCSU tenzükba indang tongmelang agi rasaa metetdaktsü.
Planning & Organizing Committee, Convenor, N Nzanbemo Tungoe-i tepela anküp o jembia liasü.