Kaketshirtem meyong sen !

Oagi India-len college balala nung azünger kaketshirtem noklang asem dak tali scholarship manguba ajanga meyipa arur Kohima nung parnok meyong scholarship meshia longkak aittsüsa akümbaji temeimtsüka, taaktsüka aser tejashitsüka lir. Kaketshirtemji temeimtsüka kechiyong parnokji center sorkar nungi class ter ajangtetter azünger Scheduled Tribe purtem nem agütsüba scholarship magütsüra mezüngtettsü. Ano, tali temeimtsü aketbaji scholarship manguba ajanga pei azüngdak sen magütsüteti timtem ajurur kaketshirtemji Nagaland anüdoklen alir kintem nungi lir. Aji oda, parnok nembo central government kübok Ministry of Tribal Affairs nungi anguba scholarship nung state government-i dena enoksemer agütsütsüba ser nung parnok atema Delhi nungi yokba sen tashi magütsütet nungbo state sorkar nung alirtem asoshi taaktsü mapaji aji ka asütsü. Iba ama mapa jagi alima yanglur masü saka asüng lanurtem jangratema alitsüba lima raksatsür asütsü. Tang Indialen oa azünger kaketshir 329 ya Dimapur nung alir Eastern Naga Students’ Union ajanga anepalua yokbatem liasü. Parnok ya sensaker chirnurtem dang lir, anungji tsürabur sen agi azüngtsüba masü saka India government-i agütsüba scholarship agi azüngtsüba purtem lir. Aji oda, parnok azüngba kaketrejutem nung ketdsangsertem den parnok azüngba sen ajakji parnok scholarship nungi dang agütsütsü ta tangatettep ken o renemer yur azünger. Tangar state nungi arur kaketshirtembo pei pei state government-i mapang shitak-shitak nung scholarship yokba ajanga kecha timtem melii azümger. Ajisüaka, Nagaland nungi aortemjibo pei chiyongba tsüda agütsütsüba sen mali tangar tsüngdang kodaka maksür alitsü ta jashiseta bilemer. Naga nunger kaketshirtem India leni tazüngi aobaji state sorkari lenmang bushia yokba masü, saka kaketshir telongjem (ENSUD) ajanga lenmang bushiteta yokba lir. Aji oda, kaketshirtemi ashibaji shitak süra, Nagaland state government-i parnok nem scholarship agütsütsüba senji center nungi Tribal Affairs Ministry ajanga February 4, 2016 nü sen crore 26 dak tali yok saka iba senji kaketshirtem nem lemsaa magütsü. Iba senji kongi ao ta tang kaketshirtemi bushir. Iba onük ya kanga tongtibang asünungji center government-ia bushitsüa akok. Aiben government nung alirtemi sensaker kibong aser chirnurtem atema süoki ia mebilemtsür. Iba jagi government mozü kibo mashika asünunga ojang ta bilemer. Iba amaji government school-bo junga anepalu masüyonga, private school aika lirji ta bilemer. Iba ama sensaker tia memetet aser mebilemdangi inyakba ajanga sensaker chirnurtem school aser college junga mezüngtetter aser junga mezüngtet nungji parnok inyaknütsü inyaka taküm raksar. Tanü asen lima raksaba aser tipmademba teraji government nung alirtemi sensakertem dang meima mebenshiba, mezüngshiba aser parnok shilem shitak magütsüba ajanga adokba timtemtem lir. Atangji, tanübo Naga nunger aika takar aser tulur kümogo. Parnokjibo ita sen mapang shitak nung manguyonga kecha timtem mali, peria dang lir. Ajisüaka, parnoki kanga meima bilemtsübaji yimtak aser town nung alir sensaker chirnurtem lir. Asen lima yimtak yimtsüngtem nung anogo nung sen noklangka mengutetba kibong aika lir. Parnokji anogo shia mapa inyaker saka tebok masünger. Ano, town nunga Naga nunger sensaker kibong aika lir. Aiben asenoki town nung alirtembo ajak takar aser tulur amai bilemer, ajisüaka yimtaklirtem dangbo town nung alirtemsa tesensakba sensakertem lir. Item sensaker kibongtem nemji tangari jang agütsü nunga chi sorutsü chibo dena makaba purtema lir. Aji oda, Dimapur ama tatsük lima nunga fan mali aser sorchiokdang yimdong nung jana bendena soruchiokba purtem asen nisung aika lir. Item sensakertem jenjang ajungkettsütsü asoshi state government-i sentong tapu balala inyaka yaritsüla. Ajisüaka, tanübo state government-iang sensaker kibongtem nungi adokba kaketshirtem indang scholarship magütsüi sota ayuba osang angashir. Shiba leniba nung südir süang, yamaji mesüi sensaker aser kaketshirtem jenjang tajungba küma anitettsü asoshi kanga süoki ia bilema inyaktsüla !  Iba ama kaksetshirtem timtem ajurudangbo, dena meliaka, NSF aser ANCSU purtemia ola adoka yariteptsüla.