Kaketshirtem mongdang

Tang ya Nagaland nung aser talisa Ao lima nung kaketshirtem mongdang aliba mapang ka lir. Loktiliba nung kaketshirtem ya kanga tongtibang telok asünungji, parnok lokti mongdang aliba sentongji tanü aser asüng asen lima asoshi kanga tongtibang asütsü. Yimya agi kaketshirtem mongdang sentong nung tanü putu tensa den apet onük nung tashitemetettertem nem jembidaktsür. Iba denji ano tongti tesemdanger jaoka shisalemsateptsü maongka agütsür. Item ajakji kaketshirtem mongdang nung kanga tongtibang shilem asütsü. Atangji, kaketshirtem mongdang alibaji tangari jembiba o kija angar senshitsü alir masü saka kaketshirtem rongnunga sentong tapu balala ajanga  parnoki bilemba shisalemsateptsü asoshi mapang tajung ka angur. Ano, kaketshirtem mongdang aliba ajanga asen tsürabur sobaliba otsü aser maparen mesamai tanü tashi wazüka yutetter. Itemji kaketshirtem ajanga loktiliba nung tajangzük bener arutsüba mapatem asütsü. Item dakji alaka kaketshirtemi tanü tensa asen loktiliba nung temelenshi bener arutsütsü nüngdakba tesem aika lir. Item tesemtem rongnung tanü asen lima nung election agiba tesem ya ka asütsü. Election nung kaketshirtem nem yi jemdaktsüba, sen agi vote aliba aser sen agütsür tashiyim mapa inyakdaktsüba mapatem ajakji kaketshirtem mezüngmeshiba mapa ka lir. Aji oda, candidate mashi kati kaketshir mashi ka sen agi alia mashi mapa nung amshitsü akokba tensa tia aser tesemji kangasa majung aser idak nung jagi asen lima aser lokti raksatsü tenzüker. Ano, asen lima aser loktiliba nung temelenshi bener arutsü kanga nüngdaka aliba tesemji ochimashi mapa inyakba ya asütsü. Joko, mapa inyakdak indangindanga ochishia inyakbabo lapir lapir aser meshitak mapa ka inyaker amai bilemer. Iba ochimashi temenen jagi asen lima nung light peria marudaktsütetter, iba jagi talisa kaketshirtem lesson junga mebushiteti timtem ajurur. Ochimashiba temenen ajanga tanü asen lima gari lenmang, school aser mozü kitem agi asenoksasa asenok nümamedangtettsüsa kümogo. Itemji kaketshirtem asoshi tebilemtsütem dang masü saka tajungba küma inyaktsü asoshi tayongzükba mapatem asütsü. Alima ajaklen kaketshirtemi temelenshi bener arur. Aji oda, asen lima nunga tamalen azünger kaketshirtemi temelenshi tajung aika bener arutsüogo. Tanü asenok benjongbentsü külemi amongba, tsürabur süoshi sapua agiba aser yimtak kima yimdong merüka ayuba terenlok mapa tajung ajakji kaketshirtemi bener arutsüba temelenshitem lir. Aji oda, tanübo kaketshirtemi inyaktsüba khuretji akhi kaketshirtemi ajuruba tebilemtsü dang nungi tuluba kümogo. Akhidangbo, asen lima loktiliba nung tashitemetettertemji kaketshirtem dang liasü saka tanübo kaketshirtem dang nungibo maparen tapu balala nung tenzükertemang tuluba aser tashitemetetba lir. Itemji teimbaka ochimashirtem, lokti dang nungibo peiang taoba ta bilemertem asünungji, kaketshirtemi parnok anema menokdaktetter. Itemji kaketshir mongdang nung kaketshirtemi bilemdanga jembitsüba tebilemtsü onüktem asütsü. Item ama tebilemtsü tesemtemji reprangteta mejembi tashi tongti o jembiri o tajung jembiba agi kaketshirtem majangzüktsü aser tongti o jembiri jembiba agia temelenshi tajung bener marutettsü. Tanü asen lima raksaba ya kangasa mejungi raksaa alinungji, iba teraksa lima yanglushiba nung shilem agir tajung kaka asütsü asoshi kaketshir mongdang nung kaketshir shiai tenangzükba kaka agitsüla. Joko, tanü tensa nung kaketshirtem mongdang aliba yabo asen lokti aser yimten nung tamajung aliba ya atsüngdoker tajung agi melentsü jembiba senden aser apusoba mapang asütsüla. Alima ajaklen kaketshirtemi yimten tashi atsüngdoka temelenshi bener arur süra asen lima nunga kaketshirtemi parnok asoshi tarutsü lima tajung ka yanglutsü asoshi tasü itta nokdaktettsü imlar.