Kaketshirtem ochimashi mapatem anema rarar akumtsüla: NPCC

Pfütsero, Sept. 09 (TYO): Nagaland nung kaketshirtem ya ochimashi aser sübokrem mapatem anema rarartem akumtsüla, ta Nagaland Pradesh Congress Committee nung tir Wb. K. Therie-i metetdaktsü.
Pai iba o ya Pfütsero Government College nung kaketshirtem den jembidang metetdakja liasü.
Paisa kaketshirtem ayongzüka ashidang, tanü Nagaland tatar senden nung Naga nunger nüngdak aser tebilemtsü ken o süoka jembiba senden ka asütsüsa ajaki shilem agia inyaktsüji kanga tongtibang kümogo. Government inyakyim nung amshiba senotsü ajak ya nübortem meyong ta bilema ochishia amshitsübaji kanga nüngdaka kümogo, ta ashi.
Nagaland nung sübokrem amshiba aser ochimashi inyakba maparen ya tanen maka oa lir, anungji item ochimashiba mapa anema lanurtemi ola adoktsüla aser Tsüngrem tsübuba yimsusurtem shima yimten yanglutsüla, ta pai metetdaktsü.
NPPC tirisa kaketshirtem dang nisung shia pei takum nükjidong kaka alitsüla aser ibaji tongteta inyaktsü atema meranga inyaktsüla ta metetdaktsü. Kaketshirtem pei lima nung dang melii tangalenia aotsüla saka mapa ka nungbosa mongin küma inyaktettsüsa meteta alitsüla. Aji oda, kaketshirtem zünger mapa mangutsüsa aliba tensa tia ya tejashitsüka lir, anungji Congress nem dang yimli agutsüra, lanurtem inyaktsü mapatem adokdaktsütsü, ta NPCC tirisa nangzük.
1942 küm May 24 nü Sir Winston Churchill-i India nüchiso atema ken o lemtepba mapang ashiba o ka bilemteta ashidang,”Yimten tashiji ozüng raksartem keti aotsü. India nunger lenirtem dak kecha tajung mali, parnoki o tajung jembir saka temulungbo tazüng, kecha mali. Yimten tashi raktepdang parnok o parnok na rarateptsü aser idangji India akoksatsü. India nung mapang ka arutsü, idangjibo tzü aser mopong asoshia alimelen meshitsü.”
Iba amaji tanü asen lima nung yimten yimsusurtemi ochimashi inyaker aser aji nembangtsütsü atema ketdangsertemi kanga meranga inyaker, ta paisa ashi.