Kaketshirtem sobusolemtsü tetuyuba agütsüba anema lungkak ait

Chennai, September 29 (Agencies) : Chennai nung aliba engineering college kati tetuyuba agütsüba social media nung kanga belenshiba sülen anogo ishika lir Mongulbarnü kaketshir telok kati iba tetuyuba anema lungkak aitba sentong ka agi.

Sai Sri Ram Engineering College nungi kaketshirtemi gari lenmang mokdanga lungkak atema police-i parnok apu.

Kaketshirtemi ashiba agi, tetsür kaketshirtemi leggings mesüra jeans asemba mesüra class nung tebur den jembiba atema senchi achir.

“Sobusolemtsü nungi tenzüker jajaba aser noktakba yimya atema senchi lir. Tola nung buttons aser collar koma enoktsüla ta tashi tetuyuba agütsüba nung shia lir. Onok college-i stretch pants semer marudaktsür aser teburtemi tetsür den jembira ibaji tim masü ta ashir” ta Sairam nung kaketshir kati ashi.

Tetsür kaketshirtem leggings, short kurtas aser tight tops masemtsüba aser mobile phones, Facebook aser WhatsApp mamshiba tetuyuba agütsüba ka social media nung kanga belenshi aser iba sülen tanü lungkak aitba sentong agi. Ajisüaka Sai Sri Ram Engineering College ketdangsertemibo iba tetuyubaji parnoki magütsü ta metetdaktsüogo.

“Ashikülaker kari onok college tenüng amshitsü merang. Tetuyuba agütsüba nung onok indang letter head aser seal ali asü mali? Onok tenüng menüktsüogo. Onoki tetsü mesüra tebur mebendanger. Ozü kaketshirtemi alima nung tajungtiba kümdaktsünür” ta college director, Professor Maran-i osangbenertem dang ashi.