Kaketshirtemi khuret akoktsüsa kaketshisatsü ajanga renemtsütsüla

Kohima, Apr 10 (TYO) : Kaketshisatsü bushiba nükjidong ya mark tajung angutsü asoshi dang masü saka shitakbajibo kaketshirtem taküm nung khuret kokyonga aotsü asoshi renemtsütsüba mapa ka lir ta Sub-Divisional Education Officer (SDEO) Kohima, Talingangla-i metetdaktsü.
Education Department ya department-tem rongnung ajak dang tongtibangtiba department ka lir, iba yagi nisung shinga mesendoki kaketshisatsü angazükdaktsütsü asoshi inyaker ta laisa ashi.
Lai iba o ya yakanü Ura Academy Kohima nung SMC Leaders, EBRC L. Khel Kohima aser Viswema purtem den Nübortem nem RTE Act 2009 angatetdaktsüba, School Mission Committee (SMC) mapa aser khuret , Education, Special Training quality, Civil works, Swachh Bharat, UDISE, CAL Social Audit Accounting aser financial, Padhe Bharat Badhe Bharat, Schagun sentongtem aser inyakyim indang training agütsüba sentong ka nung jembidang metetdaktsü. Iba sentong ya District Mission Authority (DMA) SSA, Kohima ajanga ayongzükba liasü.
Government-ibo kaketshisatsü tajung agütsütsü atema sentong aika yanglur saka item sentongtemji shitak mapa inyakba ajanga kaketshirtem nem tajangzük agütsütsübajibo SMC nung züngsemtem khuret asütsü ta laisa ashi.
Kaketshisatsü shitak angazükdaktsütsü atema government-i yangluba sentong aika liaka mangatetba ajanga takok ngua meinyaktetter ta SDEO Kohima, Neizetuonuo-i metetdaktsü.
Anungji, kaketreju anepalur aser tesayurtemi item sentongtemji angatetdakja inyaktsübaji kanga tongtibang asütsü ta laisa ashi.
Ano, kaketreju nung tesayurtem nem talila mapa Census inyakdang aser election mapang mapa agütsüba ajanga tesayurtem khuret talila akümer, anungji itemji anentsüla ta laisa metetdaktsü.
School Education department nung sentong balala asoshi senotsü yokbatem meshiaki amshira itemji jungjunga reprangtsüla aser Education department nung inyakertem ya tesem ka nung mapang talangka mayutsüla ta laisa tebilemba kar lemsatep.
Iba kasa sentong nungsa, State Mission Director SSA, Gregory Thejawelie-i SMC züngsemtem aser lokti nung lenirtem ayongzüka jembidang, nisung ajaki pei teinyaktsü mapa aser nükjisong meteta kaketshisatsü tajung timti agütsütettsüsa inyaktsü ajungshi.
School indang temetettsütem benden dang kaketshirtem aser school yongsük aser tanga temetettsütem ajak shitak agütsütsüla ta a paisa metetdaktsü. Tesayurtemi tanurtem kanga junga anepalua sayutsüla aser SMC züngsemtemi kaketreju nung maparen shitak aor asü maor ta teti khuretsa reprangtsüla ta paisa shisem.
Iba sentong okila jembidang, Assistant District Coordinator DMA, SSA Kohima, Thongsenlo-i Communitization of Elementary Education sentong kübok VEC teinyaktsü indang metetdaktsü. Communitization sentong ya ajanga kaketshisatsü angazükdaktsüba maparen nung government o nübortem na kasasa khuret bena anepalutsü aser nübortema school madak kibur kümdaktsütsü asoshi latetba ozüng ka lir ta paisa metetdaktsü.
Iba sentong nung Coordinator EBRC L Khel Kohima Visato Koso menden liasü aser Coordinator EBRC Viswema Ruokosenuo-i shilem agirtem ajak dang pelaba metetdaktsü.