Kaketshirtemi NH-102 mokdanga ayu

Imphal, Chiteni/July 30 (Agencies): Amungnü Thoubal district nung kaketshir aser nüburtemi NH-102 Imphal-Moreh section mokdanga ayuba ajanga ghonda asem tashi gari senzü senpong mesüteti aküm. Iba tatalokba ya Thoubal district kübok Khangabok tesem nung alir class IV kaketshir ka tenüng agi Khundrakpam Zeplin mozüki ka nung doctor-i junga merprangba ajanga Küptoknü aonung asüba sülen atalok.
Kaketshir aser nüburtemi lenmang ya anepdang 10:00 ako nungi 1:00 ako tashi mokdanga aliba local MLA arua ken o asatepba sülen lapok.
MLA-i iba ken o ketdangsertem den lemteptsü asoshi nangzükba sülen parnoki lenmang lapoktsü.
Lenmang lapoktsüba sülena nüburtemi nikongtsütsü tashi lenmang tezülen mener longkak ait.
Iba telok yagi sorkar mozüki dena raksatsüogo. Parnoki ashiba agi, kaketshir ya temang nung tashitsü atuba sülen Thoubal district hospital-i anir ao saka idakji aliba doctor-i junga anepalu masü.
“Onoki pa mozüki-i aritepa anir ao saka duty nung aliba doctor tem chia jemtepa liasü aser shiranger junga anepalu masü aser iba ajanga kaketshir ya südaktsü,” ta tanobusanger kinunger kati ashi.
Tanobusang asüba osang angazükba sülen Khangabok nung aliba nüburtem mozüki yagi ao aser idakji aliba osettsüttem raksatsü.
Ajisüaka police tem mapang shidak nung oa atongba ajanga mozüki kanga sashiabo meraksa.
Amungnü iba tesem nung lokti senden akaba mapang mapa shidak minyakba doctor nem tapet temerenshi agütsütsü asoshi ketdangsertem dang akhangtsü atema joint action committee (JAC) ka tentetogo.