Kaketshirtemi nükjidong tejangja ayutsüla : Deo Nukhu

Dimapur, August 12 (TYO) : Bodbarnü Higher & Technical Education Parliamentary secretary, Deo Nukhu-i kaketshirtem dang pei azüngba nükjidong tejangja ayutsüla ta tayongzükba agütsü.
Kaketshir kati kanga aroka shisadanger ang subject shimtsüla aser iba subject kanga junga shia metettsü asoshi merangtsüla. Ano kaketshirtemi kaketnang nungi teyari angubatem agitsüla kechiyong shiametetbaji anogoshi inloker ta Nukhu-isa ayongzük.
Bodbarnü Dimapur Government College Indoor stadium sayatsüdang Deo Nukhu-i iba onük jembi.
Iba college nung azünger kaketshirtemi takok ngura, mapang ka parnoki college tali renlokdatsütsü atema teyari agütsütsü, ta paisa ashi.
Nukhu-isa ashiba agi, Dimapur Government College ya National Accreditation Convention (NAC) Bangalore ajanga agizüktsü imlar aser ibaji asü nungdang sorkar nem agüja aliba ama science stream tenzüktettsü.
Iba sentong nung tetushi süa jaoker Director Dr. Norbert Noraho-ia o jembidang ashiba agi, kaketshirtemi mapa ajak nung tetoktepba ajurur aser ibaji atema kaketshirtemi kanga junga metettsüla.
Tanü sentong nungsa tongti tesemdangeri Akali Sema nem Dr Hokishe Sema Award (Arts) aser Asish Chakraborty nem L. T. Yepthomi Award (Commerce) agütsü. Ano political science (sponsored by political science department) nung mark timba angur nema kukaket agütsü.
DGC Principal, Kuholi Chisi-i o jembidang. UGC aser sorkari teyari agüja indoor stadium yanglutsüba atema pelaba ashi.
2016 nung Dimapur Government College küm 50 abensatsü aser ibaji matongdang NAC-i college agizüktsü imlar, ta laisa ashi.
Tanü sentong nung Dr. Jamedi Longkumer-i meshiteta sarasadem aser associate professor, Bendangsangba-i anküp tepela o jembi.