Kaketshirtemi nükmen maiba kaketshir asütsü meranger

Ao Kaketshir Telongjem 5th-6th mile Area pur Silver Jubilee sentong nung kaketshirtemi temeja ken ka atenba noksa nung angur. Dimapur, September 30, 2017.

Dimapur, Sept.30 (TYO): Nisung shia nükmenji Tsüngremi masodang nungi yanglutsür, anungji iba nükmenji aibelen mesüi Tsüngrem nükjidong tongteta alitsübaji kaketshir ka asoshi tongtibangtiba teinyaktsü lir, ta Tir Yimyim yimozülur, Wb.K.Temjen Jamiri metetdaktsü.
Pai iba o ya tanü Honibar nü Ao Kaketshir Telongjem 5th-6th Mile Area purtem Silver Jubilee amongba sentong nung “Nükmen Maiba Kaketshir’ omen nung tongti o jembidang metetdaktsü. Dimapur nung 5th – 6th mile ta ajaba tesem ya akhidang Sugar mill lapoka aliba tesem aser temekettem to lir.
Nisung shia tasodang nungi pa mesüra la kolok nung Tsüngremi ‘mental map’ ka enokja lir. Iba map nungjiang pa mesüra la aotsüba lenmang aser atongtsüba tesemtem indang tejangja agüja lir. Iba map nung agüja aliba lenmang aser tesemji nisung shia asoshi Tsüngremer nükjidong asütsü, anungji kaketshir shia asoshi ibaji angatettsü kanga tongtibang lir ta Tir Yimyim yimozülurisa ashi.
Paisa kaketshirtem dang, “Tsüngremi pei taküm asoshi yanglutsüba nükmen aibelen mesüi aotsü atema pei taküm nung ochi alitsüla,” ta metetdaktsü. “Iba ochi yabo senotsü shitak amshitsü jembiba ochi masü saka peisasa pei dang ochishia alitsü nüngdakba indang ochi asütsü. Aji oda, asenok shisatsü aser temulungjang nung jangraa bilemba mapa ka masü saka tangar dang sayutsü atema tangar jilu ajizüka benshiba mapatemji peisasa pei dang ochimashi mapa inyaker asütsü. Ochimashibaji aji lir. Iba jagi tamakok angutsü aser Tsüngremi yanglutsüba nükmem aibelentsü,” ta paisa ashi,
Paisa kaketshirtem dang peisasa pei taküm nung ochishia alitsü atema tasü aittsüla aser tasü aittsüba tashiji nübortem meima inyakba nungi dang angutsü ta metetdaktsü.
Tanü asen lima nung kibong aika tebok mesüngtet timatemba aser linük tenzükertema aika meshimetsüa senzütsüsa akümba tamakok aser maksüji parnok makmasü masü saka asenok kaketshir aser lanurtem maksü lir. Itemji temenünütsüka masü saka temulung ayangtsüka, iba tebilemtsüji kaketshirtemi akoktsüla aser iba ama maksü tia nungi nüchiso angutsübaji kaketshir aser lanur khuret asütsüla, ta Wb.K.Temjen Jamirisa metetdaktsü.
Paisa kaketshirtem dang, “tanü putu nung kaketshirtem yabo tarutsü lenirtem masü saka tanü lenirtem asütsüla,” ta metetdaktsü. “Lenir asütsü atema kibong aküm atatsü menüngdaker mesüra tantsür tambur aküm atatsü menüngdaker,” ta tayongzükba ka paisa agütsü.
Tanü putu nung asenok senzüba lenmang agi asenok nümamedangtet senzüba, asenok mozü kidang taneptsü mengutetba aser asenok government school nung shisaliok shitak mangazüktetba ajak ya tanü kaketshir aser lanurtem atemabo tia tajung ta angatettsüla, kechiyong alima nung item timtem ajuru nung dang kaketshirtemi timtem metettsü aser nüngdak reprangtettsü aser itemji topur jungjunga tanü kaketshirtemi yanglutsübaji maongka ka ama bilemtsüla. Ibaji dang masü saka asen lima nung rongsen mamshii dang yuja lir, anungji tanü kaketshrtemi item rongsentemji agiteta asen lima nung tayimtsü dena yanglua anüngleni atutsü bilemtsüla,” ta Tir Yimyim züluri kaketshirtem den mangdang lemsatep.
Iba sentong nung tongti o jembirisa Jubilee nüngo kaket sayatsü.
Iba sentong nung Jubilee salem o Ao Kaketshir Telongjem Dimapur nung tir Sp.Lanutoshi Aier aser Unity Village Council nung mendenbuba Wb.Talitemsü Tzüdir nati jembi aser tebu tedi Rev. Kari Longchar-i kaketshirtem atema sarasademtsü.
Iba sentong nung temeja ken Sp.Talinungba & Kr. Akümnaro Ozüküm na teloki ka aser Kr. Tiasola Pongeni ka ta atenba aser Sp. Meyisadang Aier & Kr.Temsümongla Longkümer nati sangro azüngba agi tadenertem temoatsü ngudaktsü. Iba sentong lapoka Unity Village Ao Baptist Arogo nung sannüker Wb. I.Panger Jamiri sarasadem aser ATK 5-6 mile area nung tir Sp. Talinungba Jamiri telok pelaa agizükba o metetdaktsü.
Iba jubilee sentong takok ngua agitetba asoshi Tsüngrem aser shilem agirtem ajak nem tenüngsang agüja pelaba o Jubilee Planning cum Fund Raising Committee nung Convenor, Wb.Bendangaküm Longkumeri metetdaktsü aser UVABA nung tetsür tesayula Wt.Imtisangla Jamiri sarasadema sentong tembang.
Iba jubilee sentong nung menden Sp.Rejulong Lemtur aser Kr.Moajungla Pongen na liasü aser Kr.Süneplila Tzüdiri piano atem.