Kaketshirtemi PM Modi-i jembiba o mangatsüla: Anand Sharma

New Delhi, January 30 (Agencies): Congress Party lenir, Anand Sharma-i Ato kilonser, Narendra Modi tazüngba kuli indang jembiba ajanga maneni yimtenren nung mangatettep adokdaktsüogo.
Sharma-i, Ato kilonser, Modi indang degree nung tashishitsü lir, anungji kaketshirtemi pai jembiba o mangatsüla, ta ashi.
Mongolbarnü (January 29) nü Ato kilonser, Modi-i Delhi nung 2buba “Pariksha Par Charcha 2.0” nung kaketshir, tsürabur aser tesayur 2,000 den jembia liasü.
PM Modi-i jembiba onük dak sendakba nung tasüngdangba ka langzüdang Sharma-i, “Ato kilonser Modi indang degree nung tashishitsü keta lir, ajisüaka pai kaketshirtem nem tesayuba agutsütsü meranger,” ta pai ashi.
“University temi RTI tasüngdangbatem (Modi indang degree) sendoker. Pai-a takok mangu, anungji kaketshirtemi pai jembibaji mangatsüla,” ta Sharma-i ashi.
Modi dak alia Anand Sharma-i Bharatiya Jana Sangh (tamalen BJP) tentetsang, Pandit Deendayal Upadhyaya-a aija jembi.
“Deendayal Upadhyaya ya shiba liasü? Kechiba BJP sorkari pa indang anogomong amonger? Pai tajung kechisa inyak?” ta Congress lenirisa asüngdang.
Paisa, Modi-i aniba BJP sorkari Indira Gandhi aser Jawaharlal Nehru nunger asoba mesüra asüba anogomongbo kodanga mamonger, ta ashi.
Deen Dayal Upadhyaya ya Mathura nung 1916 küm September 25 nung aso aser RSS pracharak ka liasü.