Kaketshirtemi tangatetba melenshitsüla : TR Zeliang

Kohima, October 20 (TYO) : Naga nunger kaketshirtemi tensa melenshiba den putepa tangatetba melentsüla aser tesüiba mapang onüktem nung ammeter malitsüla ta Nagaland Chief Minister TR Zeliang-i ayongzük.

Naga Students’ Union Delhi nungi teshimtet telok ka den sensaksemdang Zeliang-i parnok dang lokti nung temelenshi bener asütsü merangang ta ayongzük.

“Naga yimten tebilemtsü ya Naga nunger ajak asoshi lir aser talisa lanu putu atema lir kechiyong iba ya ajanga nür yimten tia yanglutsü. Iba tebilemtsü ya ajak asoshi lir anungji asenok ajak külemi longjemer shisalemteptsüla” ta paisa ashi.

“India sorkari mapang talangka nungi telemtetba magiteti aruba Naga yimten tebilemtsü bentettsü atema inyaktsü ayimoktsüba nung asenok ajak tejakleni arua iba tebilemtsü atema Naga nunger ajaki agizüktetba telemtetba ka agitsü merangtsüla” ta Chief Minister-isa ashi.

Paisa ashiba agi, Naga yimten tebilemtsü atema telemtetba tajung ka agitsü nükjidong nung züngsem 60 agi akümba Nagaland Legislative Assembly züngsem ajak longjemogo.

Ano tanga sangdong ka nung, Nagaland Chief Minister TR Zeliang-i Durga Puja aser Dussehra benjung salem metetdaktsü.

“Asen linük nung Durga Puja aser Dussehra ya Hindu nungertem atema tongtipang benjung ana lir aser nübortemi langa longsolongbena amunger” ta sangdong nung shia lir.

Nagaland nunga Durga Puja kanga longsoa amunger aser Durga Puja o Dussehra benjungtem ajanga Nagaland nung alirtem dang jungtepba aser ochi ajanga yimjung, teputep, azükaru aser tepela bener arutsür ta osang sangoktsür, ta TR Zeliang-isa metetdaktsü.