Kaketshirtemji tarutsü lennirtem lir: C. Apok Jamir

Dimapur, May 13 (TYO): Hokolbarnü Diphupar Naga Students Union (DNSU) 23 buba Biennial general conference nung Tourism Parliamentary Secretary, C. Apok Jamir-i o jembidang, kaketshirtemji tarutsü lennirtem lir ta ashi.
NEZCC complex, Diphupar nung sentong alidang, C. Apok-i kaketshirtem longjemer tarutsü atema inyaktsü ayongzük.
Tanü asenok mangatettep ken o tem aliba alima ka nung lir aser asenoki tayongzükba aika ajurur. Nagaland nunga kasa tensa lir aser iba tensa tajungba kümdaktsütsü atema asenoki tanü mapa inyaktsü nüngdaker, ta paisa ashi.
“Tanü asen loktiliba nung telemsa aika adoka lir, anungji lanurtemi aibelentem ajiteta metongshitsüla aser Naga nunger ajak longjemtsü atema nendaka mapa inyaktsü nüngdaker. Ajisüaka, asenok longjemba kija agi dangbo asenok tejakleni motettsü saka Tsüngrem taochi aden nungdang pai asenok tim lenmangi anitsü,” ta C. Apok-isa metetdaktsü.
Tanü sentong nung Dimapur Naga Students Union tir, Sungkum Aier-ia o jembidang, kaketshirtem dang loktiliba nung temelenshi bener arurtem asütsü ayongzük.
DNSU 23 buba Biennial general conference nung tongti tesemdangerji Irrigation & Flood Control Irrigation & Flood Control, Jacob Zhimomi liasü