Kaketshisatsü anetdak, Mokokchung !

Mokokchung district ya Nagaland nung tanga district-tem ajak dang nungi tamapur (pioneer) ta asenoksasa shitetba kuli kaji, Khristan yimsü tajung agizükba dang masü saka kaketreju dena lapoka kaketshisatsü angazükdak mongchen tajung küma mesemtetba mapa ya asütsü. Iba jagi, Ao lima ya Naga nunger ajak asoshi kaketshisatsü anetdak tesem tajung aser tongtibang ka aküm. Aji oda, Aotsür Aoertem dang masü saka Naga nunger anüdok aser anülulen alirtem aika Impur aser Mokokchung-i kaketshisatsü bushia arua azüng. Tanü item taküm aser kibongtemji aika Aotsür Aoertem dang nungi kanga agia temetetba aser jenjang tajungba nung lidagi. Aji oda, 1980s tetenzüklen tashi Mokokchung district kübok lapoka akaba government high school-tem nung dena tangalen nungi kaketshirtem longsulongsua arua azüngba mapang liasü. Ajisüaka, kong komaser kaketshisatsü anetdak alirtem toang tangaleni kaketshisatsü aneti aotsüsa akümar memetetika dang, tanübo Mokokchung district nungbo government high school aser college-bo mali ama, Aotsür Aor kaketshirtem aika bendangleni kaketshisatsü bushii aoba angur. Iba ama mapang ka nung, Mokokchung nung osangbenertemi Fazl Ali College tia oagi reprangdangbaji, Mokokchung dak aketba tenüng aser teronem tajung to ano khen shia arudaktsünüba tejangraba aser taginüba ka sayuba mapa ka asütsü. Atangji, Fazl Ali College ya Mokokchung nung tejentiba college ka lir aser joko küm 60 jungogo. Aji oda, tamasabo Arts college dang tenzükba, tangbo Science dena sayur aser joko linük nung kaketshisatsü sayuyim melenshi nungji, yakta Fazl Ali college nunga tang sayua aliba subject-tem dak tali bendenloka sayutsüsa akümtsü. Iba nükla nung tang ya kaketreju ajak kiojen aser sayuyim tasen angazükba nung terenemshiba mapang ka lir. Tangbo ano inyakyim tajung saka ano tekümdangtsü kaji, kaketreju kobasüdir süaka, ajung majung kecha mesükshii ajak maneni lapoka aotsü ta masü saka majungba kaketrejutembo shibangtsü aser tajungba purtembo ano tajungba küma aotsüsa yaritsü ta government sentong lir. Ibayongji, talisa Higher Education jenjang nung college kwika lapoka lir, item jenjangtemji asadangtsü atema mapang shia University Grant Commisison-i shimtetba National Assessment and Accreditation Council (NAAC) telok arua kaketreju renlokba aser inyakyim ajak asadanga repranger külen pei mapa dak alang jenjang (grade) C nungi A++ tashi agütsür. Aji oda, college ka asoshi NAAC purtem arua reprangdanger alangtettsüba jenjangji kanga tongtibang lir, kechiyong iba yariji dang UGC nungi college aser university terenlok atema senotsü lemzüktsütsü. Tang Fazl Ali College jenjang ya B grade nung lir. Ibaji C aser A na tsüngda, anungji tamajunga masü, tajunga masü saka teyari ka dang ta sayur. Iba jenjang nung jagi, joko, A+ grade angutsü merangtsüba dak alaka tamajungba jenjang kati alu nungbo teyari lenmang mesademba akümtsü, kechiyong tanü putu tasenba inyakyim yabo, yangi tamalen shisemba ama, tamajunger ajungshipet ajungshia aser yarisema tajung kümdaktsütsü merangba putu masü saka tajungertemang tajungba kümdaktsütsü merangba putu lir, kechiyong tajungertema yarir meyarimar. Aji oda, College asoshibo NAAC Peer team arutsübaji tsüngrem arutsü amai renemteper. Iba ama mapang ka nung ali tenla agütsürtemi anir yimten, arogo aser kija kibongi college ajungtsü atema tenla tapu balala agüja yaribaji government asoshi tayongzükba aser nübortem asoshi temoatsü tulu asütsü. Ajisüaka, ano külen, iba ama kaketrejutem rongnung tajungtiba asütsü toktepba mapang ka nung, Fazl Ali College nungbo Rashtriya Uchchatar Shiksha Abhiyan (RUSA) sentong ajanga center government-i yokba sen agi ki ka merenemtet odang toktsübaji, tanü aser asüng kaketshirtem asoshibo takoksaji ki ka dang nung jagi meyirijangben agi tuluba aser teimba akoksatsüba mapa ka lir, kechiyong iba kiji merenemtetba agi kasa RUSA sentong ajanga tangar college kiojen ter metsü renema aodang, FAC asoshibo senotsü lenmang shibangadoktsü. Ibaji, talisa, AKM-i kanga temulung agüja bushisüngdanga inyaktsüba mapa ka asütsü. Mokokchung nung Kisama mali, anungji tangar sobaliba benjongbentsü reprangi marur aser tangar nüngdak bushia arua asenok dang nungi alitsüsa tangbo asenok ket nung kecha maka aser tangar bendangertem puatsüsa asen ket nung tesayutsüa kecha maka, anungji asenok orr reprangtsü aser alia bener arutsüba dak alaka, tang tangbo tangar asen limai aneti arutsü nüngdak mali kümogo. Ibaji kodang asenoki arokaroka bilemdangdir, tanüa asenoki temulung agüja inyak nungbo asen lima ya tangar aika asoshi Delhi aser Shillong ama kaketshisatsü anetdak , akhi ama, tesem tajung ka kümdaktsütettsüsa shisa tajung angutsü.