Kaketshisatsü bushiba ya angazükba dang masü bilemdangtsüla

Dimapur, Oct. 19 (TYO) : Kaketshisatsü bushiba mapa ya kechisarina angazükba dang masü saka tekolok aser temulung ajunga agi merajemi aser mengujemi aliba shisa tasen ngutettsüsa bilemdangba mapa asütsüla ta Nagaland kilo kilonser, Y.Pattoni metetdaktsü.
Pai tanü Bodbar nü SD Jain Higher Secondary School, Dimapur purtem 69 buba küm tatem sentong nung tongti tesemdanger o jembidang metetdaktsü.
Paisa ashiba agi, kaketshir ka takümji kanga tongtibang mapang ka lir, iba mapang nung kaketshir shiai pei nükjidong atongtsü asoshi pei mapa nung kanga temulung agüja inyaktsüla. Iba mapang nung ya kaketshir shiai pei nükjidong kaka ayutsüla aser ibaji atongtsü atema meranga inyaktsüla ta Patton-isa ashi.
Tanü tetoktepba putu nung tangar dang nungi teküpbok asütsüsa züngtetba aser inyaktetba nisung jagi loktiliba nung jenjang tajung mangutsü, anungji jenjang tajung ngutettsüsa kanga nendaka aser meranga inyaktsüla ta paisa ashi.
Kaketreju ajungba ya kaketshirtemi meranga inyakba ajanga jungdaktsür, anungji ibaji mamai kaketshirtemi meranga azüngtsüla ta Patton-isa ajungshi.
Paisa SD Jain Higher Secondary School,Dimapur dang iba school nungi HSLC aser HSSLC tatidang nung küm shia temaba takok jenjang ngutetba asoshi tenüngsang agütsü. Iba school nungi HSLC tatidang nung state rank holder 82 adokogo aser topper asütsüsa trokben tashi adokogo.
Nagaland kilo kilonserisa taküm küm HSLC tatidang nung top 10 jenjang nung takok angur nem senpet sen Rs.50,000/- agütsütsü nangzük.
Iba kasa sentong nung School Principal, Reji Abraham-i school report agütsü aser School Managing Committee nungi Ajay Sethi aser Jain Samaj tir OmPrakash Sethi natia tepela aser tajungshi o jembia liasü.
Iba sentong nung tongti tesemdanger den Dr Longri, Chairman, DAN, Tongwang Konyak, Advisor, DUDA , Shetoyi, Parliamentary secretary, Fishery & Printing & Stationary, Commissioner of Police, Dimapur Liremo Lotha nungertem liasü.