Kaketzülur 7-i Sahitya Akademi Award meyitsüogo; Sahitya Akademi awards rongtak senden ayonger

New Delhi, October 12 (Agencies): Linük nung tamangba yimsü balala tsüngda mepetmesü adokba anema Hombar nü Booker Prize takok angur aser kaketzülur, Salman Rushdie-i pai anguba award meyipa agütsütsü sangdongogo.

Tawa Dadri nung nashi shi achi ta tai tonglokja Muslim nunger arishi küm 50 tebur ka tepsetba aser Sahitya Akademi board züngsem aser kaketzülur, M M Kalburgi tepsetba anema lungkak aitba temaitsü maneni kaketzülur tenet-i Sahitya Akademi awards meyipa agütsütsü sangdongogo.

“Sahitya Akademia anema ni Nayantara Sahgal aser tangar kaketzülur ajak pusemer. India nung sadoka jembitettsü aser litettsü atema tansütsü mapang arudar,” ta ashi.

Linük nung tensa majungba aser kaketzülurtem amakba anema Akademia-i ola madokba atema Jawarhalal’er kinünger arishi küm 88 Sahgal-i mezüng ibaji aija ola adoka liasü.

Kashmir nunger kaketzülur Ghulam Nabi Khayal, Urdu kaketzülur Rahman Abbas aser Kannada kaketzülur Srinath D N nungeria Sahitya awards meyipa agütsütsü, ta sangdongogo.

Kaketzülur M M Kalburgi tepsetba aser tamangba lokti balala tsüngda tesempatep aser rara anema Khayal aser Srinath na den Hindi kaketzülur Mangalesh Dabral aser Rajesh Joshi natia pei awards meyipa agütsütsü ta sangdongogo.

Punjab nunger kaketzülur Waryam Sandhu aser Kannada translator G N Ranganatha Rao natia, Akademi awards meyipa agütsütsü melungtetogo, ta shiogo.

Item ajak densema kaketzülur 16-i, linük nung tamangba yimsü nütsüng ajema alirtem (minority) kümzüka mali aser amokmerner ta aija ibaji anema pei awards meyipa agütsütsü sangdongogo.

Kaketzülurtem aikati pei awards meyipa agütsüba sülen Akademi-i October 23 nü Executive Board senden ayongzükogo.

Sahitya Akademi Tir, Vishwanath Prasad Tiwari-i, iba reju (Akademia) yagi Linük Temzüng nung alibatem atema inyaktsü melungteta lir, ta ashi.

Tiwari-isa, “Iba senden nung committee den o lemtepba sülen telemtetba ka agitsü. Iba senden nung oshi balala nungi kaketzülur kakati shilem agitsü,” ta ashi.

Ano Akedemia atema jenjang majungtsü kaji, Deobar nü Kannada kaketzülur Aravind Malagatt-ia Academia toktsüogo.