Kaketzülur, Arundhati-i National Award meyiptsür

New Delhi, November 06 (Agencies): Taoba kaketzülur, Arundhati Roy-i la nem agütsüba National Award meyiptsüogo.
Arundhati-i Best Screenplay shilem nung agizükba National Award meyiptsüba ajanga laia sempet balala agizüker kaketzülurtemi parnok nem agütsüba sempet meyiptsür rongnung tan densemogo.
Taoba mapang nüngtugu Booker Prize agizükla, Arundhati-i 1989 küm yangluba ‘In Which Annie Gives it Those Ones’ film nung amshitsü oren renemba nüngtem nung National Award sempetji agizüka liasü.
“Nisung tepsetba maparen dang tangar den lenji oa melitetbaren ta ajatsüji mapet,” ta shia, Arundhati-i la nem agütsüba sempet meyiptsüba osang jangjaogo.
India nüburtem nem tetsükdakba kecha majurui pei tebilemba lemsateptsü temeten agüja alibaren ajemrepa ayuba anema longkak aita sayutsü nükjidong nung India nunger tongti kaketzülur, filmyanglur aser academician-temi ‘Award Wapsi’ ta ajaba parnok nem agütsüba sempet balala meyiptsütsü tenzüka maparen tenzüka lir.