Kaketzülur Sarah-i Award meyipa agutsür

Thrissur (Kerala) Oct. 10 (Agencies): Honibar nü Kerala tsür nüngtugu kaketzülur aser Kendra Sahitya Akademi Award angula, Sarah Joseph-i, Uttar Pradesh, Dadri nung nashi shi achi ta olulu proka Muslim nunger ka tepsetba anema lungkak aita lai iba award meyipa agütsütsü, ta shiogo.
Kaketzülur MM Kalburgi tepsetba aser Muslim nunger ka tepsetba dak sentakba nung lai, “Kaketzülurtem tepseter, nisungtem tepseter, ghazal kentenertem shilem agitsü memelar. Iba ya ni sadema aliba India memesük kümogo,” ta ashi.
“Tang aliba sorkar kübok tetsübu taliba akümer aser sadema meliteter,” ta laisa ashi.
2003 küm anguba award meyiptsütsü sangdongba mapang lai, “Tang linük nung mapang kanga tamajungtem süidar. Iba ya Emergency mapang anogo tamajungtem den-a tamajungba ama ni bilemer,” ta ashi.
“Iba akhümket award anguba atema ni kanga pela liasü. Ajisüaka tangbo asen linük nung tatalokbatem nung ya onok kaketzülurtemi shilem agitsü lir ta ni bilemer. Anungji lungkak aita taoba mapang ni anguba award den senpet meyipa agütsütsü,” ta lai osangbenertem dang ashi.
Arishi küm 69 Sarah-isa, “Nisung kati achiba nunga aser nisung kati temeim lemsatepba nunga tetsübu aitogo, aser nisung kati zülunüba mesüra jembinüba nunga tetsükdaktsü kar lir. Iba ya temaitsü tamajung ka lir,” ta ashi.
“Asen Ato kilonser ya mapang shia tayimtsü nung senzür aser bendanglen o tululu jembir. Tejashitsü kaji, pa malidang tebur ka tepsetogo, kechiyong pai nashi shi achi,” ta ashi.
1999 küm sayaba kaket ‘Aalahayude Penmakkal ‘(Tebu Tsüngrem’er jalatem) ajanga Sarah-i iba award agizüka liasü.
Aam Aadmi Party Kerala unit tongtiji la lir aser yaküm Lok Sabha election nung lai Thrissur constituency nungi toktepa liasü.
UP nung atalokba anema kaketzülur Nayantara Sahgal aser sangro zülur Ashok Vajpeyi natia iba award meyipa agütsütsü telemtetba agiogo aser Urdu kaketzülur Rahman Abbas-ia Maharashtra State Urdu Sahitya Academy Award meyipa agütsütsü sangdongogo.