Kaketzülurtem lungkak aittsü atema tanga lenmang mali: Rana

Lucknow, October 19 (Agencies): Urdu sangro zülur nüngtugu, Munawwar Rana-i pai anguba Sahitya Akademi award meyipa agütsütsü ta sangdongba sülen anogo ka lir Hombar nü pai, linük nung kaketzülurtemi lungkak aittsü atema tanga lenmang mali, ta ashi.

“Item ama tatalokbatem anema lungkak aitba tesashitiba rongnung kaketzülurtemi pei award meyipa agütsüba ya ka lir,” ta Rana-i osangbenertem dang ashi.

Kaketzülurtemi pei award meyipa agütsüba atema kari aitsüba dak sentakba nung Rana-i, kaketzülurtemi lungkak aittsüsa tanga lenmang kechi ali (?), ta ashi.

“Tang puto nungbo onoki mener lungkak aita, lumia lungkak aita mesüra lenmang nung lungkak maittettsü. Atangji onoki zülutettsü, ajisüaka Kalburgi (Karnataka state nungi nüngtugu kaketzülur) dak kechi atalok’ar nenoki meteta lir. Hum kalam ke sipahi hain (onok ya kolom/pen sepaitem lir), anungji pei award meyipa agütsüba ajanga onoki züluba mapatem atema akhüm agütsüogo, iba ya lungkak aitba tesashitiba lir ta ni agizüker,” ta Rana-i ashi.

Yashi live TV sentong ka nung yaküm Sahitya Akademi Award agizüksang Rana-i award meyipa agütsütsü sangdonga liasü.

“Tang linük tensa nung ajemdaker lungkak aita award meyipa agütsür kaketzülur ajak den onok dena lir,” ta pai ashi.

Paisa, kiralongraba nung süoki ia o enteptsü nüngdak, ta ashi.

Lokti nung kari kiralongrababo kiralongraba mapa ta züngshir, ajisüaka kari kiralongrababo kiralongraba masü ta mezüngshir, ta pai tesasaba olen ka ashi.

“Iba ama tensa ka nung onoki anguba sempet meyipa agütsütsüsa akum, aser tarutsü nunga onok mapa atema sorkari agütsüba onoki kecha magizüktsü. Onoki onok sülen anidaker nema-a yamaji inyakdaktsüner,” ta pai ashi.

Rana-isa, sangro zülur ka aser linük meimer ka ama kiralongraba tatembang kati arudaktsütsüji pa dak-a khuret lir, ta ashi.

“Kiralongraba ya tatembang kati marura, asenok taküm ali majungtsü. Khen nung ka dang litettsü,” ta pai ashi.

Taoba ita Uttar Pradesh, Dadri nung Muslim nunger kati nashi shi achi ta olulu jembiba nung ajemdaker loktii tepsetba aser Karnataka nung nüngtugu kaketzülur Kalburgi tepsetba sülen linük nung kaketzülur 40 dak temai lungkak aita award meyipa agütsüogo.

India nung kaketzülurtemi lungkak aita award meyipa agutsüba ya alima linük 150-ia pusemogo.