Kalam asoba anogo nung ‘Youth Renaissance Day’ amungtsü

Chennai, July 31 (Agencies): Tanü Tamil Nadu sorkari, taoba linükmTir Abdul Kalam nüngtem nung award ka agütsütsü aser küm shia pa asoba anogomung nung “Youth Renaissance Day” amungtsü ta sangdongogo.

Scientific ainba, meimchir asoshi inyakba aser kaketshir lokti ajungtsü atema junga inyakertem nem küm shia Independence Day anogomung nung ‘Dr A P J Abdul Kalam Award’ agütsütsü asoshi luden ka tentettsü atema Tamil Nadu Chief Minister J Jayalalithaa-i tuyuogo.

Iba ya lar sorkar mapatong, ‘Tashitait India aser tashi itdaktsüba Tamil Nadu’ atema lir, ta tanülai sangdong ka ajanga metetdaktsü.

Iba award nung gold medal gram 8, senpet lakh pongu aser certificate ka state nungi noisung ka nem agütsütsü, aser ibaji taküm küm nungi tenzüka agütsütsü, ta chif minister-isa ashi.

Ano Kalam asoba anogo October 15 ji taküm nungi tenzüka state nung ‘Youth Renaissance Day’ amungtsü, ta laisa ashi.

“Abdul Kalam-i pa teti tesayur ka inyaka dang linüa liasü. Kaketshirtem melung nung kongshitsüsa aser lanurtem aintsüsa pai onük junga jembiogo,” t alai ashi.

Kalam-i kanga meranga inyakba yong pa scientist mongin ka dang masü saka linük Tir-a aküm, 2020 küm tashi nungbo iba linük ya superpower ka akümtsü pa mangdang liasü, ta Jayalalitha-isa shisem.