Kalam asoba anogomung nung linüki pa nem akhüm agütsü

October 15, 2015 nü New Delhi nung Ato kilonser Narendra Modi-i taoba mapang linük Tir, Dr. A.P.J. Abdul Kalam indang commemorative postal stamps sayatsüba noksa nung angur.

 New Delhi, October 15 (Agencies): Brihostibar nü taoba mapang linük Tir, A P J Abdul Kalam 84buba asoba anogo benjungmung nung Ato kilonser Narendra Modi-i, tayongzükbatem ajurudang Kalam bilemtettsü, ta ashiba den külemi pa takümji India nunger aika atema ajungmesor ka liasü, ta ashi.

Modi-isa, sorkari Tamil Nadu nung pa asoba tesem nung memorial ka yanglutsü, ta ashi.

Taküm July 27 nü asüsang taoba Tir Kalam asoba anogomung nüngtem nung ayongzükba sentong ka nung jembidang Modi-i, “Nisung tapu ana lir, kati maongka bushir aser kati tayongzükbatem bushir. Kalam Saheb-i teti tayongzükbatem bushia liasü, aser ibaji pa arishi anogo tembang nü tashi pai maneni bushiogo,” ta ashi.

Taoba Tir-i linük asoshi inyakbatem tushia Modi-i, pa asüba ajanga tapok apabaji pai sayubatem chichia benshiba ajanga süngtsütsü, ta ashi.

“Pai menden tulu, Tir menden toktsüba sülen tesayur mapa inyak. Iba ya temelungtetba ka melira mataloktsü. Lanur scientist temi Dr Kalam tesayubatem ajanga ajungmesodaktsütsüla,” ta Modi-i ashi.

Modi-isa, Kalam memorial atema pa asoba tesem, Rameswaram nung ali nguogo aser ibaji yanglutsü atema committee ka tentetogo, ta metetdaktsü.

Tanep Ato kilonseri “A Celebration of Dr Kalam’s Life” omen nung photo exhibition ka lapoktsü aser DRDO Bhavan nung Kalam kürakyanglu ka sayaja liasü.

Iba sentong nung Union Defence Minister Manohar Parrikar, Urban Development Minister Venkaiah Naidu, Communication & IT Minister, Ravi Shankar Prasad aser Science & Technology Minister, Harsh Vardhan nunger densema tongti ketdangsertema aika dena liasü.

Bharat Ratna award angusang Kalam ya July 27, 2015 nü alima nungi pila. 2002 nungi 2007 küm tashi India Tir 11buba inyaksangji Kalam liasü.