Kalikho Pul asüba ken o CBI nem bushisüngdang südaktsütsüla : Rajkhowa

Guwahati, October 26 (Agencies) : Asür Kalikho Pul-i miim tezüluba aika yutsü ta shia, taoba Arunachal Pradesh Angh, Jyoti Prasad Rajkhowa-i Bodbarnü Kalikho asüba atema CBI nem bushisüngdang südakjang ta takhangba agütsü.
“Indian politics anokshitsüsa Pul-i miim tezüluba aika yutsü ta tongtipang nisung aikati kü dang shiogo” ta Rajkhowa-i ashi.
Taküm August 9 nü Itanagar nung aliba chief minister bungalow nung Pul alenseter lia angu.
Osangbenertemi Rajkhowa dang paia tezülubatemji angu asü mangu ta asüngdangdang, “Ni tezülubatem mangu. Ajisüaka, tezülubatem nung zülua aliba kar kü dang shiogo saka ni itemji tangbo yimjak nung mashitsü” ta pai langzü.
“Angh ka ama ni administration meinpronga teka amouka meinyak aser tezülubatem memeshi. Ajisüaka, nisung aikati item tezüluba nguogo. Pul’er kinungertemia züngogo aser social media nung aser Arunachal Pradesh osangkakettem nunga iba osang adokogo. Tongtipang nisung aikati kü dang tezülubatem nung zülua aliba shiogo” ta paisa shisem.
“Iba jagi ni Arunachal Pradesh Chief Minister, Pema Khandu dang CBI nem bushisüngdang südaktsütsü atema ashi aser paia kanga mulunga agizük. Saka, ni Angh menden yutsüba sülen, iba onük mejembii kümogo” ta Rajkhowa-isa metetdaktsü.
“CBI nem bushisüngdang südaktsütsübaji Prime Minister mesüra Home Minister-i dang tetuyuba agütsütsü akok.
Pul ya kümsük punguben tashi inyakba MLA ka lisü aser pa nüngtugu lennir ka aser ochimashi anema rarar ka liasü. Pa teratatsü keta asüba saka iba tatalokba ya CBI nem mesüi police sub-inspector ka nem agütsübaji tim masü” ta paisa ashi.
“Police-i masü saka okadaki dang pa soseta asüba kuli agütsütsü akok. Tang iba tatalokba ya IGP N Payeng lenisüba nung bushisüngdangdar aser pai tezülubatemji shibanger magistrate ka nem agütsüogo ta ashir. Ajisüaka, ibaji judicial mesüra executive magistrate ka nem agütsüar ni memetet” ta taoba Angh-isa ashi.
Asür Kalikho Pul’er caretaker-a kasa ki nung ita ana sülen soseta asü, ta Rajkhowa-isa shisem.