Kalimpong nung GJM-i tasümang 2 bener lungkak ait ; Rajnath Singh-i Darjeeling nung yimjung alitsü ayongzük

Deobarnü Siliguri anasa Sukna tesem nung GJM pusemertemi lungkak aitba sentong ka agiba angur.

Darjeeling/New Delhi, June 18 (Agencies): Deobarnü Kalimpong nung lungkak aitertemi public library ka, panchayat office 2 aser police gari ka mi agi rongdoktsü saka Gorkhaland takhangba atema tesepti Darjeeling nung tatalokba kecha maliasü.
Gorkha Janmukti Morcha (GJM) züngsemtemi tanü Honibarnü police-i khasetba mang ana bener yimdong nung lungkak aitba sentong ka agi.
Anogo ananü tsüngda Union Home Minister Rajnath Singh-i West Bengal Chief Minister Mamata Banerjee den anaben tashi phone ajanga osang metetpela aser pai lungkak aitertem dang ozüng alema meinyaktsü saka olemtep agi angatetteptsü mepishia metetdaktsü.
GJM-i mapang telatet makai mokdangtsü ayongzükba sülen anogo pezübuba nung, Deobarnü Kalimpong nung kaketnang ka, panchayat office 2 aser police indang gari ka mi agi rongdoktsü, ta police-i metetdaktsü.
Ajisüaka, GJM-i item tatalokba nung parnok maden saka Trinamool Congress (TMC)-i parnok tenüng menüktsütsü nükjidong nung inyak ta tai tongloktsü.
Lungkak aitertemji Chowkbazar nung adenshi aser idakji Gorkhaland state tentettsü takhangba agüja yimyim ayim. Parnokisa Darjeeling nungi police aser sepaitemi anientsü atema takhangba agütsü.
Parnoki tasümang anaji bener aser GJM indang wako o poster tem amer yimdong nung lungkak aita senzü.
Tanep 9:00 ako nungi Darjeeling nung Internet services shibangogo. GJM züngsemtemi social media amshia osangtem belenshiba aser taitsü aketba osangtem prokshiba nokdangtsü atema iba mapa ya inyaker, ta police-isa metetdaktsü.
Muslim nungertemia tanü Darjeeling nung yimjung bener arutsü aser Gorkhaland tentettsü atema takhangba agüja lungkak aitba sentong ka agi.
Union Home Minister Rajnath Singh-i Deobarnü Darjeeling nung Gorkhaland state balaka tentettsü atema takhangba agütsürtemi ozüng alema meinyaktsü aser yimjung nung alitsü atema mepishia metetdaktsü.
“Iba onük den sendaktepa aliba party aser teloktemi olemtep ajanga mangatettep alibatem angatetteptsüla” ta Rajnath-i ashi.
Home Minister-isa ashiba agi, India ama democracy ka nung, ozüng alema inyakba ajanga telemtetba mongutettsü.
West Bengal chief minister Mamata Banerjee-i Rajnath den phone ajanga tensa indang osang tejangja metetdaktsüba sülen pai iba temepishiba ayimoktsü.
“Olemtep akaba ajanga onük ajak angatetteptsü akok. Iba onük den sendaktepa aliba telok aser nisungtemi timtesüidang angatetteptsü ayongzüker” ta pai ashi.
Ajisüaka, Rajnath Singh-i mepishibaji Gorkha Janmukti Morcha-ibo pela magizüker.
GJM-i ketdangsüa Gorkhaland state balaka tentettsü atema mapa inyaker aser parnok lennirtemi ashiba agi, MHA-i parnok den indangindanga jembitsüla.
Tir election agitsü aliba jakdang, Centre-i West Bengal dena state tem anema o mejembinür, ta GJM lennirtemi ashi.
Parnok indang general secretary Roshan Giri-i sorkar den ajuruteptsü atema Delhi nung oa lir, anungji Rajnath-i tanü yimjung alitsü mepishia sangdongba atema süngmanger, ta GJM lennirtemisa ashi.
MHA-i tanü sangdong agütsüba ajanga BJP aser GJM tsüngda yimtenren mangatettep ka adoktsü. Centre sorkari tenemleni sepaitem yokba aser BJP pusemba Gorkha nunger dak teka sangshiba atema GJM lennirtemi Centre dang mepelar, ta Roshan Giri den yariteper kati ashi.
Mamata Banerjee-i Gorkhaland pusemertemi North East nungi telungpur teloktem den tesendaktep lir ta jembibaji tiyazü ta GJM tanishir Bimal Gurung-i tanü metetdaktsü.
“Lai jembiba nung kuli kecha mali. Lai nübortem mashileni anitsü meranger. Onoki takhangba agütsüba nung telungpur teloktem den tesentaktep kecha mali. Onok maitsü atema rarar. Gorkhaland metentet tashi onoki inyaktsü” ta paisa ashi.