Union minister, Kalraj Mishra-i Police complex, Chumukedima, Dimapur nung NER conclave alidang ‘Laghu Udyog Samachar’ sayatsüba noksa nung angur. (Dimapur, February 26, 2016)
Dimapur, February 26 (TYO): Hokolbarnü Union minister of Micro Small & Medium Enterprises (MSME), Kalraj Mishra-i Chumukedima police complex nung North East Region conclave on MSMEs lapoktsü.
Iba sentong ya north east state 8- Arunachal Pradesh, Assam, Manipur, Mizoram, Meghalaya, Nagaland, Tripura aser Sikkim nungertem atema lir.
Kalraj Mishra-i tongti tesemdanger o jembidang ashiba agi, Ministry of MSME indang teinyaktsüji state temi entrepreneurship, employment aser livelihood asoshi inyakba mapa nung yariteptsü atema lir.
MSMEs ajanga linük nung technology centre 15 tasen lapoktsü aser item rongnung Arunachal Pradesh aser Manipur nung ka ka lapoktsü sentong lir, ta Mishra-isa ashi.
Paisa, Nagaland nung Khadi Plaza Centre ka lapoktsü atema Ministry-i sen crore 6 agütsütsü, ta metetdaktsü.
Sentong nung Nagaland chief minister, TR Zeliang-ia o jembidang, North East Region nung entrepreneurs aser enterprises putu tasen tenzüktsü atema takoktsü lenmang sademsadema lir.
Industries & Commerce Parliamentary secretary, Amenba Yaden-ia ashiba agi, Ministry of MSME nung Cluster Development Programme kübok mapa 6 inyaktsü atema benokba agizükogo aser tawa tu Common Facility Centre atema mapatong ana inyaktsü Ministry dangi benogo.
Amenba Yaden-isa Ministry dang, Dimapur (Sub jail anasa) nung Nagaland Tool Room & Training Centre lapoka alibaji Regional Centre kümdaktsütsü atema mepishia metetdaktsü.
Iba sentong nung Nagaland Chief Secretary, Pankaj Kumar (IAS)-i tesentepertem ajak pela agizük aser Manipur o Mizoram nungi ketdangsertemia o jembi.
You must be logged in to post a comment Login