Kamal Haasan anema ken o benok

New Delhi, November 03 (Agencies): Tamil film actor aser yimtenren nung ajemoktsü sentong alisang, Kamal Haasan-i ‘Hindu nunger Kiralongra’ ta jembiba atema IPC sections 500, 511, 298, 295(a) & 505(c) nung ajemdaker pa anema ken o ka benokogo.
Kamal Haasan-i, linük nung Hindu right-wing teloktemi rara adokdaktsür, ta aija liasü.
Kiralongra ken otem nung Hindu nungerbo maitsütsü ta jembiba o aija pai, “Hindu kiralongraba atema jembiba anema Right wing-i menokdaktettsü, kechiyong kiralongraji parnok camp-a tongogo,” ta ashi.
Pai jembiba oji aikati, talisa BJP-i junga magizüktet.
BJP National otongdar, GVL Narasimha Rao-i, Kamal Haasan ya Lashkar-e-Taiba (LeT) tentetsang, Hafiz Saeed den kasa medemdanga jembi. “Tanü Kamal Haasan-i kasa o jembidang, pa-a P Chidambaram (Congress lenir) aser Hafiz Saeed (LeT tentetsang) nunger rongnung adener, aser iba ya ajanga pa-a Congress kongsang akumtsüa akok,” ta paisa ashi..
Arishi küm 62 Haasan-i yimtenren party tasen ka sangdongtsü atema aikati yongyaba mapang ka nung pa anema ken o benokogo.
Iba ken o ya Deobarnü angadangtsü.