Kamrup district nungi asangur chanu 5 kümzük

Guwahati, Monupii (May) 17 (Agencies): Tentonü Railway Protection Force (RPF) personnel temi Kamrup district kübok Rangiya railway station nung arishi küm 13 nungi 17 tsüngda tebur chanu pongu tashi Nepal-i shibelener aotsü lia nokdang.
Item asangur chanutem ya West Bengal kübok New Jalpaiguri-i aotsüba atema ticket book asütsü asoshi nokdaka liasü. Ajungbena mejangjaba nisung ana aru aser parnok dang parnok sülen anidaktsü asoshi ashi. Sepai uniform nung mesüi sobur aliba security personnel anati iba inyakyim nung temulung melemi bilema parnok ya apu. Iba sülen parnok ya government railway police nem agütsü,” ta police sangdong ka ajanga metetdaktsü.
Asangur chanutem ya Kamrup unit, Childline pur nem agütsüogo aser Rasemnü Child Welfare Committee matsüngdangi anir ao.
Nisung ka tenüng agi Prashanta Rabha ya nisung shibelenba telok nung lenir asütsü, ta temulungi melemi bilemer. Pai parnok ya station-i anir aru aser parnok dang ticket book asütsü asoshi asüngdang, ta parnoki police dang ashi. Security personnel temi tebur chanutem apuba mapang nung pa jena oadok asütsü sudi.
“Item asangur chanutem ya Kamrup kübok Chaygaon tesem nungi lir aser parnok ya Prashanta Rabha-i shibelener oya liasü. Pai parnok nem mapa agütsütsü tenangzükba nung Nepali anir oya liasü. Rabha tang jena senzüdar,” Childline, Kamrup unit, project coordinator Erani Boro-i ashi.
Police temi Rabha den sendaktepa alitsü, ta temulungi melemi apuba nisung ana ya Rajib Modahi aser Hemanta Modahi, ta jangjaogo. Tenaprongla dang police temi ken o ashishiogo.