Kandahar nung Afghan mitkar 12 taküm sama

Kandahar, September 28 (Agencies): Kandahar indang southern province nung Humvee gari ka sünga bomb inoka aliba nung pei sasa taküm lalu mesasai mapa tamajung inyaker ka mener arua pa-sasa pokset aser iba lendong nung Afghan mitkar 12 asü.
Maroof district nung sorkar aser police indang headquarter nung iba lendong agütsüba nung nisung aika yiru aser iba lendong agütsüba tenüng ya Taliban teloki agiogo.
“Mitkar 12 asü aser parnok pezü yiru,” ta Kandahar police odongtar Zia Durrani-i metetdaktsü.
Maroof koba Pakistan den arrtsü lir, iba tesem nung arrtsü anüker police tanishir kati ashiba agi, iba lendong nung mitkar 14 asü aser ti yiru, ta ashi. Iba lendong ya Bodhbar aonung adalok.
“Iba bomb ya kanga sashia apokba ajanga temeket nung aliba ki densema raksatsü aser mitkartem ya asü. Iba tesem nung kiralongrar meriktettsü mapa tenzükogo,” ta police tanishiri shisem.
Taliban teloki Maroof tesem ya ghonda ishika asoshi agitet aser raraba osettem agizükba sülen toktsür ao, ta Taliban odongtar Qari Yusouf Ahmadi-i ashi.
Iba lendong ya Taliban teloki agütsüba lendong rongnung tasenba lir aser tang bo iba telok ajanga linük nung tesem aika agiteta lir.
US Defence Secretary Jim Mattis aser NATO tekolakba, Jens Stoltenberg nati Bhodbarnü Afghan yimtiba Kabul semdangba mapang Taliban teloki Kabul nung aliba international airport nung rocket bomb aika pokloktsü.
Afghan mitkartem busema Taliban telok den US mitkartemi tayimtsü amshia raraba mapang parnoki khaloktsüba missile mapa junga meinyaki nisung aika yiru, ta osang ka ajanga ashi.
Afghan interior ministry ajanga ashiba agi, US aser Afghan mitkartemi Taliban telok den raraba mapang nisung ka asü aser 11 yiru.