Kandahar nung Taliban-i mitkar aika tepset

Kandahar, October 19 (Agencies): Afghanistan kübok southern Kandahar province nung Taliban teloki kanga sashia lendong agüja Afghan mitkar 43 taküm samatsü.
Iba lendong ya Brehostibarnü suicide bomb tem gari ana nung pokdakja tenzük.
Ayatirm nung Taliban teloki mitkartem aliba tesem-i aita iba tesem anüker 60 nungi 43 tepset, 9 yiru aser trok mangur, ta defence ministry ajanga sangdong ka nung ashi.
Maiwanda district kübok Chashmo tesem nung iba lendong adalokba mapang Taliban telok nungia nisung 9 tepset, ta osang ajanga ashi.
Hopta tsüngta mitkartem dak amakba nung tang ya asembuba lir. Mongulbarnü Afghanistan southeast tsütsü aliba tesem nung telongpurtemi lendong agütsüba mapang nisung 80 taküm sama aser anu nisung 300 yiru, aser iba ya ita pongu tsüngta linük nung azüdokshiba rongnung tesashitiba liasü.
Brehostibarnü lendong agütsüba ya Taliban teloki tenüng agi. Afghan mitkar 60 shi tepsetogo aser anu aika yiru, ta Taliban telok indang odongtar Qari Yousuf Ahmadi-i ashi.
Lendong agütsüri bomb agi sünga aliba truck ka pokdaktsü aser compound ya amak tenzük, ta Defence ministry indang odongtar Dawlat Waziri-i osangbener dang ashi.
“Telongpurtemi bomb sünga aliba Humvee gari ka süngkum anasa pokdaktsü südi aser onoki maneni bushisüngdang südagi,” ya Waziri-i ashi.
“Tia makatsüka parnoki camp telung nung kicha anünga metoktsü. Iba compound telung nung parnoki anguba ajunga rongdoktsü. Iba tensa azüoktsü asoshi ketdangsertem yokogo. Iba tesem ya Afghan National Army (ANA) kübok lir,” ta pai shiem.
Iba lendong agütsüba langzüa US-i tayimtsü amshia amak, ta Kabul nung aliba mitkar leniri ashi.
2014 küm tatemlen US aser NATO mitkartemi toktsüba sülen iba linük nung Taliban telok den Afghan mitkartem kanga sashia rara arudagi.