Kandahar nung UAE ketdangser 5 pokset

Abu Dhabi, January 11 (Agencies) : Afghanistan kübok Kandahar nung bomb lendong tulu ka atalokba nung United Arab Emirates ketdangser pungu densema pokset, ta Emirates sorkar osang ka ajanga metetdaktsü.
“Ketdangsertemji humanitarian, educational aser development project tem atema Afghanistan-i aoba liasü” ta WAM news agency ajanga metetdaktsü.
Tasürtem nem akhümtsübu agüja linük nung anogo asemnü mangyimtsü ta UAE President, Sheikh Khalifa bin Zayed Al Nahyan-i tetuyuba agütsüogo.
Mongulbar nü provincial governor`s office nung bomb tesashi ka pokdaktsü aser iba mapang UAE ketdangsertem office nungji liasü. Iba lendong nung nisung 50 shi pokset aser 100 shi yirua lir.
Bomb lendong nung Kandahar governor aser UAE envoy Juma Mohammed Abdullah Al Kaabi na mi agi yirua lir saka nisung aika tajitettsü mejungi rongsa, ta provincial police tanishir Abdul Raziq-i osangbener dang ashi.
Iba tatalokba atema nisung shingaia tenüng agiba osang mali. Ajisüaka, tawa Afghanistan nung Taliban telungpurtemi ozüng alema kanga bulua mapa inyaker.
UAE nungi teshimtet telok amakbaji yimya balaka lir kechiyong taoba mapang UAE-i Taliban den tesentaktep tajung yua liasü.
1996 aser 2001 tsüngda Taliban-i Afghanistan nung sorkar abendang, parnoki sorkar asem agizükba nung UAE densema liasü.