Kandhamal, Odisha nung Khristan 7 yaritsü mepishir

Dimapur, Chiteni (July) 2 (TYO): Odisha kübok Kandhamal nung Khristantem reshikangshiba anema journalist Anto Akkara-i osang prokshia arur.
Anto-i ‘Kandhamal – a blot on Indian Secularism’ ta ser bushisüngdangba kaket ka adokba ajanga linük anokshidakja liasü.
Luroi (August) 23, 2008 nü Kandhamal nung Swami Laxmanananda Saraswati tepsetba ajanga Khristantem anema mapa inyaktsü tenzük aser iba lendong nung nisung 100 jungnüa taküm sama, tenla ki 300 raksatsü aser Khristan 56,000 shi ka pei talidak toktsür jena aotsüsa aküm, ta tanü Anto Akkara-i Dimapur nung osangbener den jembidang ashi.
Swami Laxmanananda ji Khristantemi tasa atonga tepset ta olulu ka prokshiba ajanga Hindu nungertemi iba mapa inyak aser parnoki Khristantem ki 6,000 mi agi rongdoktsü, ta paisa ashi.
Iba tatalokba sülen küm aika lir ang Anto-i ‘Kandhamal – a blot on Indian Secularism’ kaketji zülu.
Iba ken o atema okadaki kuli tejangja meliaka Khristan tenet dak aitsü aser iba atema Anto-i bushisüngdang südar.
Swami Laxmanananda tepsettsü atema contract killers nem mapa agütsü saka okadaki tai maketba Khristantem taküm piyong atema tepuokdak yua lir, ta paisa ashi.
“Khristantem aitsür küm asem tashi süia arur saka tang tashi Odisha High Court-i parnoki (Khristantemi) temepishiba agütsüba magizük lir. Fast Track Court obendanger ana mapa nungi belenba sülen obendanger tasembubai Khristantem aija oshidang agütsü” ta paisa metetdaktsü.
“Iba ken o tai maket nisung asem dak kuli tejangja mali sür aitsü aser iba ya linük indang judicial system nung tarak ka lir” ta Anto Akkara-isa ashi.
Par tenet tepuokdak nungi chiokdaktsütsü atema nübortemi online petition http://www.release7 innocents.com nung sign asütsü mepishir, ta paisa metetdaktsü.