Kandi Public Union rongdak senden amen ; National Highway-2 mokdangtsü

Dimapur, October 22 (TYO): Kohima district, Tseminyu Sub-Division kübok yim troki tentetba Kandi Public Union (KPU) rongdak senden ka October 21, 2017 nü Sishunu Village Council Hall nung mena liasü, aser iba senden nung 2012 küm November 29 nü RD Block Chunlikha atema BDO office yanglutsü asoshi lung azüngtsüba onük nung o lemtepa liasü, ta tanü Kandi Public Union Secretary Publicity & Information, Khiyalo Kez-i sangdong ka ajanga metetdaktsü.
Küm pongu lir sülen 2016 küm November 11 nü state sorkari iba mapa inyaktsü atema M/s JK & Sons Constructions nem work order agütsü, ajisüaka tanü tashi Contractor-i RD Block Chunlikha BDO office building yanglutsü atema mapa metenzük, ta kasa sangdong nung shia lir.
“Iba dak sendakba nung KPU-i tim ketdangsertem aser state sorkar nem shidi aika agütsüogo, iba den külemi October 6, 2017 nü onoki Nagaland sorkar Rural Development Minister dang anogo 15 tsüngda RD Block Chunlikha BDO office building yangluba maparen tenzüktsü atema anogo züngzükja liasü,” ta sangdong nung shia lir.
“Züngzüktsüba anogo October 21, 2017 nü tembangogo aser onoki shidi ajanga anogo züngzüktsüba atema state sorkaria telangzüba magütsü, anungji KPU-i shilem lemsar longkak aittsü lemtetogo,” ta KPU-i metetdaktsü.
Joko tanga lenmang kecha mali, anungji KPU-i longkak aitba mezüngbuba shilem tenzüka October 31, 2017 anepdang 6:00 ako nungi tenzüka November 1 ayaterm 12:00 ako tashi (ghonda 48) National Highway-2 nokdangtsü, ta Kandi Public Union-isa metetdaktsüogo.