Kanga pelar, Dr.Clark !

Joko, asen limai Yisu Khrista temeim osang tajung arua tonger 2022 küm, küm 150 ajungba Sesquicentennial benjongmong amongtsü. Atangji, taoba küm ajak dang nungi 2022 küm yasa asenok Yisu Khrista dak amangertem asoshi tepelatiba aser tongtibangtiba küm asütsü. Asenoki junga mamangtetter dang ashi, küm 150 jakdang Tsüngremi asenok nem moatsüba Molungkimong lushi nung Tsüngrem tenyar Dr. E.W.Clark tonga atuagi limapur liasüba purtem temulung meyipa tzüsentsü tenzükba nungi tanübo asenok ajak Khristan kümer tetsübu mali pelatepa asenok onüleni oa, asenok inyaknütsü inyaka aliba ya Tsüngrem temeim aser taochi kanga tulu agi kümzükbayong lir. Küm 150 jakdangbo, asen tsüraburtembo tsükchir tsübu agi pei lui aotsübajia tetsübutsü aser tarendaktsüka liasü. Parnokbo temang ayima süoshia magi, mozü memetet, gari mengu dang, azüngtsü aser zülutsübajibo tangashia mangashi, anogo aser ita azüngtsüa yong dang süka azüngba mapang, shirurua masü aser meimchira masü ta aliba tiaji Tsüngremi Pa tenyar Dr.Clark nem ngudaktsü. Sibsagar anasa Naga tenem nung alirtem tiaji ngua Dr.Clark mulung animesüngzükteti akümbaji, Tsüngremi Ao kin samatsüba tia nungi kümzüktsü asoshi Pa taochi sentong tenzükba mapang ka liasü. Aji oda, Dr.Clark asen lima tonga aruagi asenok dang Tsüngrem temeim osang tajung shia kümzükba mapa ya asenok tanüla dang masü saka shi temang dena kümzükba Tsüngremer tesüngmangtsü taochi mapa ka lir. Ashiko, küm 150 jakdang Dr.Clark-i asenok dang Tsüngrem temeim otsü ashitsü aria bilema maru asübo, asen tsüraburtem aika tsükchirtem nok agi lepseter lila aser yimtsüngtema aika mali küma makdoker lila. Iba tensa tiaji kodang bilemdangdir, Dr.Clark asen limai maru ser, asen tsüraburtem tsükchir ket nung sama asübo, tanü asenok alima nung taküm lila na (?) ta bilemer. Aji oda, Dr. Clark ajanga asen tsüraburtemi Tsüngrem temeim angateta tsüngremtem madak Tsüngrem aser kiburtem madak Kibur dak mejenok asübo, tang asenok Sesquicentennial amongtsüba sentong yabo yutsür , asen yimer aser asen Ao kin ya kechi kümer lila ta shisabolua bilemer. Asenok melidang aser asenoki manguba agi zübazüba jembir dang ashi, Teyanglur Tsüngrem külemer masü saka Teyangluri yangluba süng aser long külema nisung tepsetba agi benjong monga pelatepba putuji tetsübutsü putu liasü. Item lendong timtem ajakji tizükteta Aotsür Aortem kümzüktsü mechi, pei ki aser pei lima tajung toktsür, Dr.Clark asenok shiruru jenjang nung lia aliba purtem alidak tonga aruagi, külemi lia Yisu temeim osang tajung agi tanüla nung dang masü saka shi nung dena nüchi kümdaktsüba temeimji asenoki pa nem kodang komaser meyipa agütsütettsü ? Molungkimong yim kümteta alidak aliba dang masü saka ano Dr.Clark-i anir Khristan yimsü aser sobaliba nung Molungyimsen küma, ano yang nung jagi asenok yim ajak Tsüngrem yimli osang tajung agi atongba dang masü saka ano pa kinungtsü tenati asenok nem zülutsü aser azüngtsü sayua angazükdaktsüba temeim aser teyariji asenoki kechi temeim aser teyari den medemdangtettsü ? Tanübo asenoki asen arogo nung alirtem kiboksemia mouner, gari nung mener sayutsüngi aobaji tuluka amai bilemer aser pei ki aser kinungertem toktsür bendang lima nung oagi Tsüngrem mapa inyaktsübaji takoksa tulu angutsüba mapa ka inyaker amai bilemer. Ajisüaka, kodang asenoki America lima nungi pei akaba ajak toktsür, rongsen bushia masü saka samaa aliba tanülatem bushia aruba Dr.Clark aser kinungtsü Mary Mead na taküm aser mapatemji asen taküm aser mapatem den medemdangdir, Tsüngrem tsüngdang, Adam o Kain na amato, konganga matsük ka asütsü. Aiben asenoki arogo küm nung tain akümba, nütsüng züinba, gari tajung ka nung arogo tenüng zülur jajaba aser tenla ki tulu tajung yanglutetba mapatemang Tsüngrem sentsüwangshidaktsüba mapatem amato züngshir. Ajisüaka, Yakobi ashi ama, item jagi asenok bangsenteper. Itemji Dr.Clark-i sayuba Yisu yimsü amangertem mapa aser jakla masü. Asenokbo Dr.Clark-i asenok dang kechi koma Yisu temeim sayua asenok nüchi kümdaktsü, yamaji asenokia tangar tanüla aser taküm karbosa kümzüktsü merangtepdi. Kenü item osangji bener asenok kotak lima atongdang, tamasa Dr.Clark bushia orr, pa dang “Kanga Pelar” ta ashitsü mamali.