Kangana-i Hrithik anema ken o ka benokogo

Mumbai, April 07, 2016 : Hrithik Roshan-i Kangana tena medemba mapang yoktepba, tangar dang mesayula email aser noksa kar tim mesüi amshiba ajanga Bollywood actress Kangana Ranaut-i Brihostibarnü ken o ka benokogo.

Hrithik-i Kangana indang noksa melemsatsü pur den lemsatepba atema pa nem temerenshi tesashi agüjang, ta la atema okatsüri Mumbai Police Commissioner nem tezüluba ka agütsüogo.

Okatsüri police nem agütsüba shidi ya IANS ket nunga ka lir aser yangji yamai shia lir: “Kangana Ranaut-i Hrithik Roshan den medemba mapang tangar dang mesayula email aser noksatem lemsatepba ajak pai tebilemba tamajung nung tim mesüi amshia la tenüng tajung menüktsüogo Iba ya matalok danga pai la amokmerenogo. Ajisüaka ni meyipa züluba pai melangzütetba yong pai ano tang la tsübudaktsütsü mapa inyaker.”

Okatsüri, “Kangana-i la temeten angutsü mechi FIR file asüba mapang nai imlibelema tekaratiba nung iba dak sentakba tebilemtsü kanga junga reprangdaktsüner,” ta kasa shidi nung zülua lir.

Hrithik-i tetuyuba nung “Aashiqui 3” film nung Kangana shilem magidaktsüba indang osang agütsütep dang “silly ex” ta jembisemba ajanga taküm küm tetenzüklen nungi tena tsüngda mangatettep adoka ken o tuluba küma aoer.