Kanglatu nung Shinümomong ka chiok

Dimapur, September 6 (TYO) : September 1, 2015 nü A. Bendang Assistant Conservator of Forests (ACF) Tuli ajanga “Shinümongmong” tepong ka tenla agüja Kanglatu Community Biodiversity Reserve arem nung forest department staff-temi chiok.
Shiruru taküm kümzüka aser renloka aotsü mechi, mapang shia shiruru tapu balala tanga tesemtem nungi bener arua iba arem nung chioka kümzüka ayur, ta Imcha, ACF, Forest Beat Office Changtongya-i sangdong ka ajanga metetdaktsü.
Kanglatu Biodiversity Reserve ya Changtongya yimer lushi nung ali tasazük hectare 700 shi ka lir aser iba ya Changtongya yimti nungi kilometer 7 shi pilar lir. Iba arem ya joko küm 30 dak tali alu meyimi wazüka ayuba arem min tulu ka lir, ta Imcha-isa sangdong nung shia lir.
Yangi asen lima nung anguba shiruru tapu ajak aser ozüsangnu tapu aika kümzüka, soyapokya wazüka ayur. Tarutsü nükla tajung yur asen lima tobur jungdakja tangatetba mapa tajung angu dang asenok ajaki pelar, ta ACF, Forest Beat Office Changtongya-isa sangdong ajanga metetdaktsü.