Kangtsüng nungertem senso tajung akümtsü renemshir

Dimapur, April 09 (TYO) : Kangtsüng nunger lanu-aien noklang pongo dak tali adenshia “Terenemtet Senso” omen nung amendaker anogo asem tashi Rajeshwari Karuna School, Tuli nung April 7 nungi 9 tashi shisatokden sentong tajung ka liogo.
Iba sentong nung shisalen teyur Tir Yimyim yimozülur Wb.K.Temjen Jamiri jembidang, tanü putu nung lanurtemi pei tsürabur senmang tajung amangtsü melena mapa meinyaki takar akümtsü merangba aser tazüngtemetetba junga mali ser tatidang majangi mapai aitsü merangba ajanga asenoki ochimashi mapatem anema menokdaktetter ta metetdaktsü.
“Ibayongji, khen mapang kabo aluyimer takar aser süchirtem jala jabaso asübatem to tanübo meshimetsür jenjang nung lir, khen mapang kabo tulur chinurtem asübatemto peisasa pei taküma anepalu mesütetba jenjang nung lir, aji oda khen mapang kabo wangshiwangshia yimsüsür chirnurtem to tepetzük tia nung angutsü, iba amaji asenok akaba aser uluba temoatsü aser jenjang tajungtemji asenoki senmang küma mamshitetter, iba jagi tanü asenok timatemer, ashiko ibaji ochi nung amendakba temoatsü jenjang masüba agi asütsüa akok,” ta K.Temjen Jamirisa metetdaktsü.
“Asenoki ochimashiba anema nokdaktsü aser ochimashirtem lenmang nung mejajatsü merangtsü melen, ochimashirtemang asenok mapa aser sentong ajak nung kanga tongtibang nisung kümdaktsür, asenoki ochimashirtemang kanga akhümtsübur, iba jagi asenok rongnung ochimashi mapatem ajanga takarba aser tulurba akümtsü tokteper amai kümogo aser joko asenoki tajung o tamajung na mebendangtetter,” ta paisa kanga sasaba o ka ashi.
K.T. Jamirisa kijung lanurtem dang, Roman nunger sepai noklang madak kibur aser tanishir akümtsü asoshi küm 20 bo timtem arema pei sen agi pei nüngdak alia pei yimten tenzükba ama, pei kija ajangzüktsü khenyongi mebilemi pei lima aser nübortem asoshi peisasa temulungtetba nung angati tenzüktetba shisatsü aser tangatetba alitsüla ta ajungshi.
Roman nunger sepai tanishir ka akümtsü asoshi pei lima meimba shisatsü, peisasa mulungtetter angati pei nübortem tenzükba aser pei taküm sama majemi temang shi nung timtem jenti agia tsükchir den raratetba aser pei nübor tenzükba mapatemji kanga tongtibang teinyaktsütem liasü.
“Roman nunger sepai noklang madak tanishir jenjangji sen agia mali mesüra yimten nung teyariteper tajung aliba agia tezülen nungi mangu aser magütsü, saka pei zü, asentzü aser taküm bendanga agüja tsükchir anema raraba sülenang angu,” ta Tir Yimyim yimozülurisa metetdaktsü.
Iba sentong nung telok ter küma lemsar tebilemtsü aser temoatsü onüktem bendena shisatsü lemsatep aser saisapong mapanga liasü.
Iba sentong nung tesem balala nungi Kangtsüng sensosangertem rongnung tatar yimsüsürtem aser tanishir taintemi tajungshi o jembia shisatsü lemsatep.
Iba sentong ya Kangtsüng Senso Telongjem Tuli purtemi ayongzük aser Wb. Subonenba Longkumer aser par kibongi nüngdak ajak tenla agüja takok ngua mongogo.