Kanhaiya-a India Today nung tashi aketer tarenseni iogo

New Delhi, March 12 (Agencies): JNU Students’ Union Tir, Kanhaiya Kumar-a India Today Kaket 2016 adok nung tashi tulu aketertem tarensen rongnung züngokogo.
Küm shia linük nung tashi tulu aketer tarensen adoktsüba kaket ‘India Today’ 2016 atema osangbenertemi tan adoktsü renemdar aser iba kaket nung lenir, actor, saisaponger, yimsüsür aser business nisungtem aliba tarensen rongnung arishi küm 29 tain, research student, Kanhaiya Kumar-a zülua lir.
Iba tarensen nung nisung 50 lir aser pa 49 buba nung zülua lir.
Yongyaseta aliba iba jenjang ya Kumar nem kechiba lemzüktsü süra, pai kaketshir jenjang tajungba küma melenshiba tsütsü inyakba dang masü saka yimtenren nunga  Left party tem jenjang tajungba kümdaktsüba ajanga lir.
Kumar ya mapang tatsüka tsüngda nung kaketshirtem atema tamendakdak aser temelenshi adokdaktsür ka kümogo. Pa tepuokdak khen puoka yur chiokba sülen JNU nung pai o jembiba ajanga pa ano mapang tatsükabosa osangbenertemi metoktsütsü ta jangja meteter.
Iba tarensen nung Priyanka Chopra-a 33 buba nung lir. La ya ken atenba dang masü saka film nung kanga takok ngua shilem agiba ajanga iba tarenseni ai.
La jakdang Indian cricket Virat Kohli-a 29 buba nung lir.
TV aser inyakyim balala ajanga oset aser chiyungtsü ajungketba nung sen timtiba entoker, Yoga guru Baba Ramdev-a ‘organic’ chiyungtsü aser Patanjali ajungkettsüba atema iba tarensen nung densemogo.
Iba tarensen nung alitsü asenoki imlaba nisungtem Bollywood super star Salman Khan 26buba nung aser Mukesh Ambani mezüngbuba jenjang nungsa lir.
Kasa tarensen nung Kumar Mangalam Birla aser Gautam Adani nata temaba jenjanglen lir. Ano Bihar yimtenren tsütsü kanga shisataka Prashant Kishore-a 21buba nung zülua lir.