Kanhaiya anema ken o tasen benok, March 28 nü angadangtsü

Meerut, March 19 (Agencies): Jawaharlal University Students’ Union (JNUSU) Tir, Kanhaiya Kumar tepoukdak nungi ita trok chioker lia ano maneni pa anema ken o tasen ka benokogo, aser iba ken oji March 28 nü angadangtsü.
Bulanadshahr nungi Bajrang Dal züngsem kati Kumar-i Indian armed force mezüngmeshir ta shia pa anema ken o tasen ka benokba sülen Hokolbar nikogndang court-i iba ken oji mezüng March 28 nü angadangtsü lemtetogo.
Osangbenertem den jembidang ken o benoksang Bajrang Dal züngsem, Hemant Singh-i, “International Women’s Day anogomung nung JNUSU Tir, Kanhaiya Kumar-i tasütait Indian sepaitem anema jembiogo. Sepaitem anema osang tai proktsü meranga pai, asen sepaitemi Kashmir aser Northeast nung tetsürtem tashiyim amshia raksatsür aser  taochi maketba mapatem inyaker ta jembi. Kumar-i linük anema jembiba o anema noktaktsü atema onoki pa anema ken o benoktsü atema Bulandshahr police station-i ao. Ajisüaka police-i onoki benokbaji agizüktsü memelung. Ibayongji onoki court-i aotsüsa akum,” ta ashi.
Singh-isa, “Hokolbarnü onoki Bulandshahr nung chief judicial magistrate court dangi ao. CJM maliasü saka additional CJM, Bharat Singh Yadav bo liasü. Onoki Indian Penal Code (IPC) nung section 124-A aser 153-B kübok ken o benokogo. Court-i kü dang March 28 nü arua ken o agütsütsü jaokogo. Iba dak alia television channel tem nung Kanhaiya Kumar-i yazü jembiba video clips-a ni parnok nem agütsüogo,” ta ashi.
Tan ita tetenzüklen Women’s Day nung kaketshirtem den jembidang Kumar-i, “Nenoki koba ama yimya ka nung onok nokdangtsü merangaka, meimchirtem temeten alema inyakba anema onoki jembitsü. Onoki AFSPA anema ola adoktsü. Onoki asen sepaitem kanga akhümtsübur ajisüaka security sepaitem Kashmir tsürtem tashiyim amshia raksatsüba anemabo maneni jembitsü,” ta jembia liasü.
Paisa, “Rwanda (Africa) rara mapang tetsür 1000 tashiyim amshia raksatsü. Africa nung iba rara mapang sepaitemi tangartem amakdang parnoki tetsürtem tama raksatsü. Nai Gujarat rara tatishitsü agitsüla, tetsürtemji tepsetba dang masü saka tama tashiyim amshia raksatsü,” ta jembia liasü.