Kanhaiya chiokba atema pelar: Shatrughan Sinhas

Patna (Bihar), March 05 (Agencies): Honibarnü BJP lenir aser MP, Shatrughan Sinha-i JNU students’ union Tir, Kanhaiya Kumar-i onük junga jembiba atema tenüngsang agütsüogo.
Sinha-i twitter ajanga, “Court-i Kanhaiya nem bail agütsüba atema pelar aser pa tepoukdak nungi chiokba atema pelar,” ta ashi.
Paisa, “Pa tim masüba nung apu ta bilema pa pusemer ajak dang pai junga inyakba ajanga kuli sayutettsü ni imlar aser sarasademtsür,” ta ashi.
Tesülen PTI osangbener den jembidang taoba mapang actor aser BJP MP, Sinha-i, JNU kaketshir leniri onük kanga jembiogo, ta ashi.
“Tepoukdak nungi aluba sülen JNU nung onük jembidang pa dak tashi tasen balaka liasü aser pa yimya jangratemtsüka liasü,” ta Patna Sahib nungi Lok Sabha nung BJP MP, Sinha-i ashi.
Pai ashiba agi, pai Kanhaiya pusema jembir, kechiyong pai iba lanur dak linük anema jembiba mangur, iba den külemi pa Bihar nungi lir.
Bihar, Begusarai district nungi Kanhaiya Kumar ya February 12 nü police-i apu aser March 3 nü interim bail nung ita trok chiokogo.
Kumar apuba mapang Sinha-i pa pusemba ajanga par party-i pa dang jashia liasü.
Sinha-i Kanhaiya pusemba ajanga Bihar BJP tongti, Mangal Pandey-i pa dang, Centre nung BJP-i aniba sorkar den ai-aura makara pai Lok Sabha menden toktsütsüla, ta shia liasü.
“Shatrughan Sinha-i pa ya BJP MP ka lir aser Centre nung ozü sorkar tashi nung lir ta pai angatettsüla. Ajisüaka ozü sorkari JNSU Tir anema inyakba nung pai ai-aura makara pai Parliament menden toktsütsüla,” ta Pandey-i jembia liasü.