Kanhaiya-i Kerala nung CPI candidate atema nüboyimtsü

Pallakad (Kerala), May 14 (Agencies): May 16 nü Kerala assembly election agitsü lia tanü Jawaharlal Nehru University Students Union (JNUSU) Tir, Kanhaiya Kumar-i par medemer aser college nung külemi azünger, Mohammed Mohsin P atema nübo yimtsüogo.
CPI candidate, Mohsin-i Pallakad district kübok Pattambi constituency nungi tokteptsü.
Pattambi nung election nüboyim lokti senden ka nung jembidang Kanhaiya-i, tamalen Ato kilonser, Narendra Modi-i Kerala state Somalia linük den medemdanga jembiba aitsü.
“Kerala ya linük nung azüng-zülu meteter jenti aliba state rongnung ka lir. Iba tesem ya sobaliba tajung arenba aser tetsür tebur mebendangi ochi temeten agütsüba tesem lir,” ta Kanhaiya-i shia, kodaser Ato kilonser Modi-i Kerala indang yamaji jembi (?), ta asüngdang.
Kochi, Perumbavur nung dalit tsür ka tashiyim amshia raksatsür tepsetba tatalokba tetshia Kanhaiya-i, asür nem ochi temeten agütsütsü atema ajaki longjemer inyaktsüla, ta ashi.
Paisa lokti dang, “Linük temzüng aser democracy wakzüka ayutsüla,” ta ayongzük.
Kanhaya-i ashiba agi, iba constituency ya tamalen E M Shankaran Namboothiripad nunger ama Marxist lenirtem adokba menden lir, aser maneni Left candidate-i takok angutsü  atema inyaktsüji ajak teinyaktsü mapa lir.
Arishi küm 30 Mohsin ya JNU nung research agir kaketshir ka lir aser pai tang mezüng election nung toktepa tang temendak Congress MLA, C P Muhammed den tokteptsü.
Ano tanga osang ka nung tanü state Chief minister, Oommen Chandy-i, Ato kilonser Narendra Modi-i Kerala state Somalia linük den medemdanga jembiba atema May 16 nü (election anogo) state-i pa nem telangzüba agütsütsü, ta shiogo.
“Modi-i jembiba o ajanga alima matsüngdang Kerala nunger maksütsüogo, iba atema nüburtemi pa nem telangzüba agütsütsü,” ta Chief minister Chandy-i ashi.