Kanhaiya-i Kerala, WB nung shilem magitsü

New Delhi, March 23 (Agencies): Left Party temi West Bengal aser Kerala assembly elections nung JNU students’ Union Tir, Kanhaiya Kumar nem nübo meyimdaktsütsüa akok, ta osang angazüker.

Ajisüaka CPI den affiliate süa aliba AISF züngsem Kanhaiya Kumar-i Kerala aser West Bengal na nung AISF aser Left student wing temi ayongzükba lokti sendentem nungbo shilem agia jembitsü.

Bengal nung Jadhavpur University kaketshir senden nunga pa adentsü akok.

Kumar apuba ajanga yimtenren nung mangatettep tulu adokba sülen CPM tongti, Sitaram Yechury-i, kaketshir lenir Kumar-i Kerala aser West Bengal assembly election nung nübo yimtsütsü, ta metetdakja liasü.

Iba sülen Yechury-isa, Kumar-i state temi tsüngdong oa nübo meyimtsütsü ajisüaka social media ajanga nübo yimtsütsü ta jembia liasü.

Ajisüaka JNU nung kaketshirtem politics aser state tem nung yimtenren politics na tsüngda ongdang tulu lir ta Left party temi shisatetogo.

“Kanhaiya-i pa ya tepuatsü aketba aser tasütait kaketshir lenir ka aser Left tangatetba nung noktaker ka ta kuli sayutetogo, ajisüaka pai Bengal mesüra Kerala nung Left candidate tem atema nübo meyimtsütsüa akok,” ta osang ka ajanga ashi.

Ano külen Assam nung Congress Party-ibo parnok election nüboyim noksatem nung Kanhaiya aser Rohit Vemula (Hyderabad University nung soseta asüsang) na noksa amshidar.

Muslim nunger nütsüng aika aliba state, Assam nung Congress aser BJP na tongti ser meneptepa tokteptsü imlar.