Kanhaiya-i nüboyimtsüba ajanga Cong, Left jenjang raksatsü: BJP

Thiruvananthapuram (Kerala), March 06 (Agencies): Deobarnü RSS lenir aser Kerala nung BJP tongti, Kummanam Rajasekharan-i, Kerala assembly election nung JNU kaketshir telongjem Tir, Kanhaiya Kumar-i shilem agiba ajanga BJP masü saka Congress aser Left party tem jenjang raksatsü, ta ashi.
“Kanhaiya Kumar onük nung Congress aser Communist party temji kasa dang, saka BJP tangatetbabo balaka. Anungji BJP jenjang majungtsüsa mali. Iba ya (Kanhaiya-i nübo yimtsüba) ajanga CPI-M aser Congress jenjang dang raksatsü. Ni amanger, Kanhaiya Kumar-i Kerala semdangba ajanga parnok jenjang raksatsü,” ta pai osangbenertem dang ashi.
Kanhaiya Tihar jail nungi aluba sülen pai West Bengal aser Kerala assembly election nung Left Front atema nüboyimtsütsü, ta jembiogo.
Kanhaiya dak sentakba tasüngdangba ka langzüdang Rajasekharan-i, JNU ken o nung o tokteptsü atema BJP-ia JNU nungi kaketshirtem jaoktsü, ta ashi.
“Kanhaiya Kumar Kerala-i arutsü süra onoki pa agizüktsü, kechiyong JNU nung atalokba rasa ashitsü atema onoki maongka angutsü. Onoki JNU nungi kaketshirtem jaoktsü. Parnoki arutsü. O tokteptsü atema onoki jangrar. Onoki Kanhaiya Kumar tsübua mali,” ta BJP leniri ashi.
Assembly menden lemsaba dak sentakba nung pai, “Menden lemsaba nung onoki aika meshitettsü, kechiyong onok teloktep party tem ano senden mamen. Mezüng senden nung onoki Common Minimum Programme indang jembiogo aser tanabuba senden nung menden lemsaba indang jembitsü. Item ajakji taruba anogo ana tsüngda tembanga jembitsü,” ta ashi.
Tasüngdangba ka langzüdang pai, BJP-i Kerala nung menden 71 dak tema nung takok angutsü, kechiyong taoba panchayat election sülen party jenjang junga lir, ta ashi.
Yakünü JNU nung osangbenertem den jembidang Kanhaiya-i, pai Kerala aser West Bengal Assembly election nung Left Front asoshi nübo yimtsütsü, ta sangdonga liasü.
West Bengal nung April 4, 11, 17, 21, 25, 30 aser May 5 anogotem nung assembly election agitsü aser Kerala nung May 16 nü agitsü.