Kanhaiya Kumar-i Assam election nung nübo ayimtsü

Guwahati, March 07 (Agencies): JNU kaketshir telongjem Tir, Kanhaiya Kumar-i taruba ita agitsü aliba Assam Assembly election nung Left party tem atema nübo yimtsütsü akok.
Tanü Guwahati nung CPM lenir, Deven Bhattacharya-i Assam election nung United Left Forum kübok Left party trokprongla senteper tokteptsü ta sangdongba den külemi pai, “Party Central lenirtemi mulungra Assam election nung Kanhaiya Kumar-i Left party tem atema nübo yimtsütsü,” ta ashi.
Tanü iba sangdong agütsüdang CPI lenir, Drupad Borgohain-ia, Assam nung Kumar-i nüboyimtsütsüji koka lir, ta ashi.
JNUSU Tir, Kanhaiya-i West Bengal aser Kerala assembly election nunga Left party tem atema nübo yimtsütsü ta osang angazüker.
Tripura Chief minister aser CPM lenir, Manik Sarkar-i pai Assam nung party atema nübo yimtsütsü ta sangdongogo.
Bhattacharya-isa, “Onoki party nung bangdak lenirtem dang Assam election atema nüboyimba nung politburo züngsemtema dendaktsütsü mepishiogo, ajisüaka West Bengal aser Kerala nunga maneni election agiba ajanga bangdak lenirtem nübo angutsüji tasak asütsü südi,” ta ashi.
Ochimashi party, Congress aser telemsa adokdaktsüba party, BJP den raratsü atema Left party tem longjemogo, ta paisa shisem.
Assam nung April 4 aser 11 nü election agitsü aser state Assembly constituency 126 nungi United Left Forum-i menden 59 nung tokteptsü.
West Bengal nung election telemsa trok nung- April 4 nü, 17 nü, 21, 25, 30 nü aser May 5 nü election agitsü aser Kerala nungbo kenüyongi, May 16 nü agitsü.