Kanhaiya Kumar-i LS election atema nüboyim tenzük

Patna, March 26 (Agencies): Taruba ita national election nung Bihar nung nisung aikati tenük yoka reprangba candidate Kanhaiya Kumar-i ‘votes’ aser ‘notes’ agüjang ta mepishir.
Kaketshir lennir Kanhaiya-i pa sasa teyari bushia Begusarai nung nüboyimba sentong inyaker. Pa CPI tenüng nung tokteptsü.
JNU kaketshir Kanhaiya-i tang mezüng atema election nung tokteptsü aser BJP nungi Union Minister Giriraj Singh den tokteptsü.
Begusarai LS menden atema nominations anogo tembangtsü atema ano hopta ka lir. Iba menden atema April 29 nü elections agitsü.
Arishi küm 32 tain Kanhaiya-i tenla meshir aser pa indang campaign team-i sen lakh 70 bendentsü alizüng yua lir.
Kanhaiya Kumar-i tanep nungi election atema nüboyimba mapa tenzük aser ghonda ishika tsüngda sen lakh 5 tashi bendenteta liasü.
“Iba ama tetsübutsü mapang ka nung asenoki asen linük temzüng aser meimchir kümzüka ayutsü atema mapa inyaker. Tongtipang onüktem atema jembirtemi tasa tamajungtem aser külen senotsü maliba timtemtem ajurur. Nenoki iba rara tashi itdaktsütsü atema peii akokba senotsü teyari agütsütsü imlar” ta Kanhaiya-i Gauri Lankesh, MM Kalburgi, Rohit Vemula aser samaba JNU kaketshir Najeeb nunger ken o tem nung ajemdaker metetdaktsü.
Kanhaiya-i “notes with votes” maparen inyakba ya tang tasen masü. Madhu Limaye aser George Fernandes ama socialist lennirtemi taoba mapang Congress candidate tem denj toktepdang iba mapa takok ngua inyakogo.