Kanhaiya tepseter nem senpet agütsütsü sangdong

New Delhi, March 05 (Agencies): BJP youth wing, Bharatiya Janata Yuva Morcha lenir kati, JNU kaketshir telongjem Tir, Kanhaiya Kumar temeli rangtoktsür nem lakh 5 senpet agütsütsü ta sangdongba sülen ghonda ishika tsüngda pa party nungi küm trok jentokogo.
Badaun district BJYM tongti, Kuldeep Varshney-i, “Brihostibar aonung Kanhaiya chiokba mapang nungi pai BJP aser Ato kilonser, Narendra Modi anema jembir. Afzal Guru ama kiralongrar pusema pai linük anema yimyim ayimer. Kanhaiya temeli rangtoktsüteter nem ni sen lakh 5 senpet agütsütsü,” ta jembi.
Kanhaiya ya Feb.12 nü police-i apu aser Delhi High Court-i pa nem bail ita trok agütsü.
Iba den kasa tanü Delhi nunga Kanhaiya tesepter nem sen lakh 11 senpet agütsütsü ta züluba poster aika yuja liasü. Item poster ji tentet tila ka tenüng agi, Purvanchal Sena-i yutsü. Iba telok yagi, parnoki Uttar Pradesh aser Bihar nüburtem atema inyaker ta jembir.
“Shibai JNUSU Tir aser linük ashioktsür Kanhaiya Kumar kahsetdir Purvanchal Sena nungi lakh 11 senpet angütsü,” ta poster nungji Hindi agi zülua lir.
Delhi Police-i Kahhaiya kümzüktsü atema inyaker
Delhi Police-i JNU ketdangsertem dang, Kanhaiya Kumar nem security takang agütsütettsü asoshi JNU campus telung nung aser temalen Kanhaiya senzüba osang tejangja metetdakjang, ta shiogo.
Kanhaiya tepouktak nungi chiokba sülen DCP (South) Prem Nath-i shidi ka ajanga JNUI kedangsertem dang, Vasant Kunj (North) Police Station SHO kübok iba campus lir, anungji pa nem Kanhaiya Kumar-i campus temalen sema senzüba, pai semdangba nükjidong aser kechi ajanga senzür’ar item osang ajak metetdakjang, iba ya lendong kecha mataloktsü atema mera agitsü asoshi nüngdaker,” ta ashi.
Police osang ka ajanga ashiba agi, February 17 nü Patiala House court complex nung Kanhaiya dak azükba sülen joko iba ama mataloktsü atema court-i police dang JNU dak sentakba ken o nung pua alir kaketshirtem tera kata meyirutsüla ta tuyua lir.