Kannada nunger shisashir M.M. Kalburgi kahsetogo

Dharwad (Karnataka), August 30 (Agencies): Karnataka nunger nüngtugu shisashir aser researcher, M M Kalburgi, shibai mapang shia süngyanglu külemba densema tanga onük aika anema jembia liasü, tanü pa par kidang lia mejangjaba nisung anati tejak chitepa pa kahsetogo.
Nisung ana motorboike ka nung aruba sülen Kalburgi’er kishi nung akoshi, aser kishi lapoktsüba mapang pa dak tenütsü aser teku na nung injang kaka kahloktsü, ta Hubli-Dharwad City Police Commissioner Ravindra Prasad-i osangbenertem dang ashi.
Arishi küm 77 Kalburgi, ya taoba mapang Hampi Kannada University nung vice chancellor inyaka liasü. Pa injang agi yiruba sülen civil hospital-i anir ao saka taküm mekümzükteti asü.
Special team ka tentetogo, aser aibelenertemji kobi melii aputsü, ta Prasad-isa ashi.
Central aser state “Sahitya Akademi” awards angusang Kalburgi-i aiben süngyanglu külemba aser state naklo ken tajungba küma yanglushitsü kanga nüngdak ta jembia liasü, aser ibaji ajanga mangatettep aiben adokogo.
Taoba mapangtem nung Kalburgi-i aiben VHP aser Bajrang Dal ama Hindu right wing tentet balala nungi lenirtem jashidakja aruogo.
Iba osang angashia Karnataka Chief Minister Siddaramaiah, Karnataka BJP lenir Jagadish Shettar aser Prahlad Joshi-i iba tatalokba aitsüba den külemi asükho osang lemsatepogo.