Karachi nung miim saoker nisung 14 asü

Karachi, Tsüklai/Feb. 18 (Agencies): Pakistan south tsütsü rong anenba yimti, Karachi nung mejangjaba miim tango (toxic gas) ajanga nisung 14 asü aser aika shirangdaktsü, ta police temi ashi.
Karachi kübok Keamari tesem nung alirtem Honibar aonung tango junga mesashiteti anasa aliba mozükitem nung anir oa anepalidaktsüba ajanga ketdangsertem aoksatep.
Iba miim aketba tango ya kong nungi adokar tang tashi mejangjateti lir, aser tang tashinung nisung 14 süogo.
Ziauddin Hospital odongtar Amir Shehzad-i ashiba agi, iba mozüki indang Keamari Campus nung ana tsüngda nisung teku asü . Police temi ashiba agi, Kutiyana Hospital nunga nisung ana asüba osang lir. Yimti nung mozüki balala nung nisung aika shiranga lir.
“Iba lendong atalokba tang tashi mebushiteter,” ta Karachi police tekolakba, Ghulam Nabi Memon-i ashi.
Keamari nung alirtemi Jackson Market nung longkak aita mejangjaba gas agi nisung asüba indang ketdangser nungi telangzüba akhanger.
Police temi doctor tem den yaritepa iba lendong tejangja metettsü meranger, ta Memon-i ashi.
Karachi Commissioner Iftikhar Shallwani-i ashiba agi, rong ka nungi soyabean mesüra iba amala oset agizükba nungi miim aketba tango ya adok südi.
“Rong nungi khu agizükba anendaktsüdang tezüknem ya sama,” ta pai ashi.
Saka Maritime Affairs Minister Ali Zaidi-ibo iba osang ya aitsü aser rong ketdangsertem junga lir, ta ashi.
Sindh Chief Minister Murad Ali Shah-i Commissioner of Karachi police dang tekeratiba nung iba osang agütsütsü totuyuba agütsüogo.