Karan Johar aser tanga producer dang sen meshiba atema nisung 6 apu

Hyderabad, May 17 (Agencies): Baahubali 2: The Conclusion film nung producer tem karan Johar densema paronok dang nungi sen meshia agitsü meranger parnok 6 Hyderabad police-i puogo. Parnoki producer tem dang film ‘pirated copy’ ka perokshitsü amokmerena sen meshi.
Police temi apur rongnung Bihar nung ‘theatre’ kibur ka densema lir.
Iba telok yagi producer tem dang sen lakh 15 meshi. Paronki aji magütsüra film ‘pirated copy’ji internet nung inoktsütsü amokmeren, ta deputy commissioner of police Avinash Mohanty-i tanü ashi.
Johar ya iba film Hindi version co-producer lir.
April 29 nü complain benokba nung Rahul Mehta ta ser nisung kati pa `anti-piracy agency’ nungi ta shia producer tem den tongtep aser parnok dang iba film indang ‘pirated copy’ quality kanga tajung ka lir ta ashi.
“Mehta-i parnok dang sample video ka sayu aser ‘pirated copy’ anogo tatsüka asoshi mesayatsü ta shia sen meshi,” ta Mohanty-i ashi.
Producer temi police nem iba osang agütsü aser maneni pa dena jembishinüa liasü. Metha ya May 11 nü Hyderabad, Jubilee Hills tesem nung puogo.
Pai Jitender Mehta, Taufiq aser Mohammad Ali nunger pa den külemi inyaker ta metetdaktsü aser parnok asem ya tasüngnü Delhi nung apu. Jitender aser Taufiq na ya taoba mapang nunga ozüng alema inyakba maparen nung shilem agiba record lir aser dena 2015 küm Bahubali-The Beginning film ‘piracy’ dak sendakba ken o nung Jabalpur police-i Madhya Pradesh nung apu.
Bihar kübok Begusarai district nung ‘theatre’ ka kibur Divakar Kumar aser Chandan na Patna nungi puogo. Monu tang tashi meputeti jenshia senzüdar aser Divakar-i iba film digital copy yanglu, ta DCP-i ashi.
Film lemshitsü asoshi theater kibur nem `encryption key’ ka agütsür aser iba key ya amshia parnoki ‘pirated copy’ yanglu, ta DCP Mohanty-i ashi. Iba telok yagi mapangshia Bollywood film tem ‘pirated copy’ yanglur, ta paisa shisem.