Karan Johar-i ‘Ki and Ka’ film tushir

Mumbai, March 24, 2016 : Tawa box office nung kanga saputepa nüngtugu akümba “Kapoor and Sons” film yanglusang, Karan Johar-i memonoi sayatsü aliba, R. Balki-i yangluba “Ki and Ka” film ajanga meimlaba otsü ka ashir, ta ashi.

“Iba film ya kangasa tajung. Iba film tangokba yimya aser otsüji khenyongi balaka. Iba otsü ya imla maliba otsü ka lir aser Arjun Kapoor o Kareena Kapoor nati otsüi aginüba ama kanga tobur junga shilem agitetogo,” ta “Ki and Ka” film masaya tsüngda reprangtepba mapang Karan-i ashi.

“R. Balki-i kanga shisa kaa züluba ajanga film jangratemtsüka yanglutet. Film tangokba yimyajia jungrara. Film ya kanga tekara, teyakyak aser oda kanga junga asadanger yangluba lir. Iba film ya nisung ajaki reprangtsüla. Nibo iba film yagi kanga ajungmesogo,” ta pai ashi.

Arjun Kapoor, Kareena Kapoor, Paresh Rawal, Akshara Haasan, Sarika, Swara Bhaskar aser nüngtugu celebraties aika arua iba film reprangogo aser parnok ajaki junger ta shiogo.

“Tang tensa film industry nung nüngdakba film ji ibai lir. ‘Ki and Ka” film ya ajak asoshi jangratemtsü film ka lir,” ta actor Paresh Rawal-i ashi.

Iba film otsü zülur, director aser producer R. Balki-i yangluba “Ki And Ka” film ya romantic comedy-family drama film lir. Iba film nung kibong lanu ka ajanga linük nung tebur jenjang sayur.

Film nung Amitabh aser Jaya Bachchan natia shilem agia lir aser iba film ya April 1, 2016 nü Eros International ajanga sayatsütsü.