Karbi Anglong nung BJP züngsem 300-i ASDC nung aden

Guwahati, Aami (June) 22 (Agencies): Karbi Anglong kübok Autonomous State Demand Committee (ASDC) nung BJP züngsem 300 shi ka tanaben parnok party nung aden.
BJP züngsemtemji ASDC tir Holiram Terang, tatong tir Chomang Kro aser tongti tezülur Jotson Bey nungertemi pelashishia agizük.
Phuloni constituency nung taoba BJP tir Khonsing Hanse-i tanaben ASDC nung adendang, pai BJP nung züngsem aküm saka iba party-i sorkar tashi anguba sülen onük aika atema tebilemtsü mabenba atema pa tamang sama, ta ashi.
“State balaka tentettsü tebilemba maliba agi ni BJP toktsü. Ni ama, iba tesem nung alirtemi BJP atema meinyaktettsü. Ni ADSC mapa inyaker ka lir, saka state balaka tentettsü tejangraba nung ni BJP nung aden. Onoki mapa inyakba ajanga Phuloni nung BJP-i Assembly elections aser KAAC election nunga takok angu, saka tang Karbi Anglong nung BJP lennirtem tsüngda telemsa adoka lir” ta Khonsing-isa shisem.
“BJP-i state balaka tentettsü takhangba atema mapa kecha meinyaktsütsü ta kü teimla sama. Anungji, kü den züngsem 300-i tanaben ASDC nung adener” ta paisa metetdaktsü.
BJP züngsemtemi ASDC tir Holiram Terang ket nung parnok indang BJP membership cards agütsü.
BJP aser Congress teloktem ya Karbi Anglong nübortem atema party masü aser iba telok anati kodanga state balaka tentettsü atema mapa meinyaktsü, ta ASDC general secretary in-charge aser taoba MLA Chandra Kt Terang-ia ashi.
Iba tesem nung lennirtemi autonomous state ka atema lungkak aitsü mejangrar saka mass movement ka tenzüktsü bilemer, ta paisa shisem.
ASDC tir Holiram Terang-i BJP züngsemtem pelashishia agizükdang, “nenok adenba ajanga regional party tashi itdaktsür. ASDC-i state balaka meshia mass movement ka tenzükshitsü” ta metetdaktsü.
BJP-i autonomous state ka agütsütsü ta nangzüka Karbi Anglong nung alirtem ashioktsü, ta Terang-isa ashi.
“BJP-i achche din (anogo tajungtem) bentsür arutsü ta nangzü saka nübortemi anogo tamajungtem ajurur” ta ASDC tanishirisa shisem.
2019 parliamentary elections nug nübortemi BJP aser Congress tamakok ngudaktsütsüla ta Terang-isa ASDC züngsemtem ayongzük.
Sentong nung ASDC tatong tir Chomang Kro aser tongti tezülur Jotson Bey natia tayongzükba o jembi.