Karbi Anglong nung CAB anema lungkak aitba manener

Diphu, November 22 (Agencies): Karbi Anglong nung lokti tentet aser yimten teloktemi anogo asemnü tashi Citizenship Amendment Bill (CAB) aser Uniform Civil Code (UCC) anema lungkak aitogo.
Brihostibarnü AASU indang Karbi Anglong District Committee, All Dimasa Students’ Union aser KSA-Simeon Rongphar teloktemi Diphu jila nung milen amer lungkak aitba sentong ka agi.
Iba sentong ya Semson Sing Ingti Memorial Park nungi tenzük aser nikongtsütsü Diphu market süia senzü.
“Northeast ya ozüng alema aruba Bangladesh nunger tejenokdak masü” ta Karbi Anglong District Committee of AASU general secretary Shorjun Hanse-i ashi.
“Northeast nungeri CAB magizüker aser iba ya benokba ajanga Northeast nung oshi, sobaliba aser akhidang nungi benshia aruba inyakyim ajak samatsü” ta Hanse-i ashi.
“Centre sorkari CAB benoka agizüktsü merangra, Northeast nung lungkak tuluba aittsü” ta paisa ashi.
Centre sorkari kin aser tamangba yimsü nung ajemdaker politics meinyaktsüla kechiyong iba ajanga lisopurtemi timtem ajurutsü, ta Hanse-isa metetdaktsü.
“Centre sorkari Citizenship Amendment Bill (CAB) aser Uniform Civil Code (UCC) benoktsü meranga anema onoki noktaker” ta KSA-Simeon Rongphar telok nung vice president Bishnu Teron-i ashi.
“Assam nung BJP sorkari two-child policy tenzükba, Karbi Anglong nung Panchayatiraj benokba aser Schedule Tribes Amendment Bill 2019 benokba onoki magizüker” ta paisa ashi.