Karbi Anglong nung ‘Kabiraj’ ka tepset

Diphu, July 5 (Agencies): West Karbi Anglong district kübok Sitoi Adong yimtsüng nung kabiraj ka nisung telok kati tepset.
Iba kabiraj jagi tetsür ana dak tim mesüi kongshi ta tai tonglokja tepset.
Kabiraj ji arishi küm 45 tain Hussain Ali ta jangjaogo. Pa ya Hojai district kübok Raikata Sandanpur nungi liasü.
Hussain Ali-i mapang talangka ‘kabiraji’ mapa inyaka aru. Ali-i tebur aser tetsürtem yaria aru saka pai tetsür aser aiürtem teimba anepalu.
“Pai shirangertemji taktang shibanger yari” ta iba tesem nung alirtemi ashi.
July 3 nü pai aiür ka yamaji taktang shibanger yari. Ano Brihostibarnüa paisa kasa yimtsüng nung aiür tanga ka takdang shibanger yari.
Ajisüaka, pa iba tesem toktsür aotsü lia nisung telok ka adenshi aser pai aiür ana dak tim mesüi kongshi ta tai tonglokja züka merenshi.
Idangji village headman-i Dongkamukam police outpost dang nisung telok kati Ali zükdar ta osang sangoktsü. Osang angashili police tesem tonga arur Ali mozü kidangi anir ao saka idakji pa asü.
“Shingaia ozüng alema meinyaktsüla” ta West Karbi Anglong superintendent of police (SP), Mrinal Talukdar-i ashi.
“Onoki iba tesem semdang. Anepdang 10:45 ako meta Sitoi Adong headman-i Dongkamukam outpost dang nisung ka züka merenshidar ta osang sangoktsü. Idangjisa IC den headman yimtsüngi ao” ta SP Talukdar-i ashi.
“Pa civil hospital nung anepalutsü atema anir ao. Ajisüaka, doctor-i pa tasü bener aru ta ashi. Police lendong atalokba tesemi orr asüngdangya asüdang kabiraji mapa inyakba tenüng amer kabiraj (Ali)-i aiür ana dak tim mesüi kongshi aser iba jagi iba lendong atalok ta osang angazük” ta Talukdar-isa metetdaktsü.
“Shitakba agibo iba osangji police nem mezüng sangoktsütsüba liasü. Ozüng nung aliba ama onoki mapa inyaker lila. Shingaia ozüng alema inyaktsü makok” ta paisa shisem.
“Onoki iba tatalokba atema bushisüngdang südar aser aibelenertem merenshitsü” ta Talukdar-isa ashi.